Бүгүн, тохсунньу 22 күнүгэр Ил Дархан Айсен Николаев уонна тыа хаһаайыстыбатын миниистирэ Александр Атласов Эбээн Бытантай улууһугар улэлээтилэр.
edersaas.ru
Александр Атласов ынах иитиитинэн дьарыктанар эдэр ыалга Августина, Иннокетий Старостиннарга ыалдьыттаата. Бу эдэр ыал 30 тахса ынах сүөһүнү иитэллэр. 2017 сыллаахха «Саҥа саҕалыыр фермер» бырагырааманан грант ылбыттара. Августина, Иннокентий Старостиннар сүөһүлэрин ахсаанын өссө элбэтэр былааннаахтар.
Салгыы Александр Атласов убуойунай сыахха сылдьан, бу сыах үлэтин-хамнаһын сэргээтэ. Санатар эбит буоллахха, 2018 сыллаахха Эбээн-Бытантай улууһугар аныгы толору хааччыллыылаах сүөһү этин астыыр — таҥастыыр сыах түргэн кэмҥэ тутуллан, Хотугу норуоттар III оонньууларын саҕана үөрүүлээхтик арыллыбыта. Саамай элбэх табалаах «Кочевник» ородобуой община баһылыга, убуойунай сыах үлэтинэн дьарыктанар Альберт Колесов оҥорон таһаарар бородууксуйатын, инники былааннарын туһунан сиһилии кэпсээтэ: «Улуус киинигэр 2018 сыллаахха сүөһү этин астыыр — таҥастыыр сыахпытын тутан үлэҕэ киллэрбиппит. Бу сыах модульнай буолар, ол эбэтэр сүөһүнү өлөрүүгэ уонна оҥорон таһаарыыга аналлаах. Аан дойду үрдүнэн «сибиэһэй эт» диэн өйдөбүл киирдэ, ол эбэтэр сарсыарда идэһэлэммит эт киэһэ бүтүөхтээх. Эти, эт аһы тоҥорон хаһаанартан сайдыылаах дойдулар аккаастанан тураллар. Биһиги улууспут сүрүн салаата — тыа хаһаайыстыбата буолар. Онон, анал астыыр — таҥастыыр сыах баара, олоххо киирэн үлэлиирэ улахан суолталаах».
«Кочевник» ородобуой община сайын аайы оскуола оҕолорун таба ыстаадаларыгар таһааран эбээн омук төрүт дьарыгар сыһыарар. И.Н. Слепцов аатынан Кустуур орто оскуолата арго хайысхалаах буолан, ыкса ситимнээхтик үлэлиир. Быйыл бу общинаҕа 35 оҕо сайылаата.
Салгыы тыа хаһаайыстыбатын миниистирэ Александр Атласов «Гарпан» этнокултуурунай кииҥҥэ тыа хаһаайыстыбатынан дьарыктанар дьону кытта көрүстэ. Мустубут дьон от тиэллиитин, сүөһүгэ эбии аһылык туһунан ыйытыктары биэрдилэр. Ыанар ынахха көрүллэр көмө харчы субан сүөһүгэ кытта бэриллэрэ буоллар диэн баҕа санаатын 40 тахса төбө сүөһүлээх Афанасий Стручков эттэ. Маны тэҥэ саха сылгытын иитиитинэн дьарыктанар дьон сылгы төбөтүгэр көрүллэр харчы тоҕо киин улуустары кытта тэҥин ыйыттылар, хотугу улуус усулуобуйата ыараханынан бөлөхтөрүнэн араарар сөп буолуо диэн эттилэр.
Ньургуйаана Иванова, “Саха сирэ” хаһыат, edersaas.ru
“Бытантай уоттара” хаһыат матырыйаалынан
Хаартыскалар «Бытантай уоттара» хаһыаттан