СӨ Тыатын хаһаайыстыбатын уонна ас-үөл бэлиитикэтин министиэристибэтигэр тыа хаһаайыстыбатын производствотын тэрийээччи, «Бочуот Знага», «Үлэ кыһыл Знамята» уордьаннар кавалердара, өрөспүүбүлүкэ норуотун хаһаайыстыбатын үтүөлээх үлэһитэ, тустууга Саха АССР сэттэ төгүллээх чөмпүйүөнэ Максим Сибиряков 85 сааһын бэлиэтиир үөрүүлээх мунньаҕа ыытылынна.
edersaas.ru
Максим Николаевич тыа хаһаайыстыбата, тыа сирин олоҕо сайдарын туһугар үтүө суобастаахтык үлэлээбитин бүгүҥҥү көлүөнэ үрдүктүк сыаналыырын этэн туран, Бырабыыталыстыба Бэрэссэдээтэлин бастакы солбуйааччы — тыа хаһаайыстыбатын уонна ас-үөл бэлиитикэтин миниистирэ Петр Алексеев «Гражданскай килбиэн» бэлиэни туттарда, «Саха Өрөспүүбүлүкэтин АПК-тын үтүөлээх үлэһитэ» ааты иҥэрдэ.
Ытык кырдьаҕаһы салгыы үлэлии сылдьыбыт Амма, Таатта, Чурапчы улуустарын баһылыктара, бииргэ алтыспыт үөлээннээхтэрэ эҕэрдэлээтилэр. Максим Сибиряков аата маҥнайгы көлүөнэ тустуук, өрөспүүбүлүкэ биир бөдөн салайааччытын быһыытынан киэҥнник биллибитэ. Кини илин эҥээр улуустарга отучча сыл салайааччы ыарахан бурҕалдьытын кэппитэ, ол курдук, аҕыс сыл холхуос бэрэссэдээтэлинэн, 18 сыл баартыйа райкомун бастакы сэкирэтээринэн, райсэбиэт исполкомун бэрэссэдээтинэн үлэлээбитэ.
Мустубут дьон Максим Сибиряков ханнык да дуоһунаска үлэлээбитин иннигэр, саҥаны, үйэлээҕи киллэрэр буулаҕа санаалаах этэ диэн бэлиэтээтилэр. Ону Амма, Чурапчы, Уус Алдан улуустарын, Тиит Арыы, Байаҕантай, төрөөбүт Соловьев нэһилиэктэрин Бочуоттаах олохтооҕо үрдүк ааты ылбыта да туоһулуур. Тус бэйэтэ бырайыактаан уон күөлү оҥотторбута, уон икки күөлү оҥорууга быһаччы кыттыһан үлэлэспитэ уонна 25 тыһ. гектар ходуһаны оҥотторбута. Дьон олорор, үлэлиир усулуобуйатын тупсарыыга дууһатын ууран үлэлээбитэ. Бэйэтин кэмигэр биллэр салайааччы, аатырбыт тустуук сааһыран да олорон сүрэҕин баҕатынан дьонум-сэргэм туһа диэн айылҕа тэбэр ыарахаттарын утары туруулаһа сылдьар.
Тыа хаһаайыстыбатын уонна ас-үөл бэлиитикэтин министиэристибэтин пресс-сулууспата edersaas.ru сайтка анаан