Тыа хаһаайыстыбатын ааспыт сыллааҕы түмүктэрин таһаардылар

Балаҕын ыйын 2 күнүгэр РФ Бырабыыталыстыбатын бэрэссэдээтэлин солбуйааччы Виктория Абрамченко, Тыа хаһаайыстыбатын миниистирэ Дмитрий Патрушев, эрэгийиэннэр салайааччылара, научнай уонна уопсастыбаннай түмсүүлэр кыттыылаах дойду тыатын хаһаайыстыбатыгар оҥоһуллубут уонна билиҥҥи үлэлэри ырытыы, бу сыл аҥарыгар саҥа сыаллары туруорууга анаммыт  мунньах ыытылынна.

edersaas.ru

РФ премьер-миниистирэ Михаил Мишустин 2019 cыл түмүгүнэн дойду аграрийдара үчүгэй үлэни ыыппыттарын бэлиэтээтэ:

—Бу сыл эмиэ үтүө түмүктээх буолуоҕа диэн эрэнэбин. Улахан агрохолдиннар эрэ үлэлэриттэн буолбакка, пиэрмэрдэр, биирдиилээн урбаанньыттар оҥорон таһаарар бородууксуйаларыттан биһиги үлэбит быһаччы тутулуктаах, — диэн Мишустин эттэ.

Михаил Мишустин суол, дьиэ тутуута, оскуола арыллыыта, интернет киириитэ тыа сирин сайыннарыыга улахан оруоллааҕын эттэ.

Виктория Абрамченко тыа хаһаайыстыбатын биир бастакы сыала таска таһаарыыны улаатыннарыы диэн бэлиэтээтэ:

—Россия бородууксуйата 160  дойдуга тахсар: Чугас Илин, Илин уонна Соҕуруу Азияҕа, Африкаҕа, Европаҕа уонна Тутулуга суох судаарыстыбалар сойуустарыгар. Россия туорахтаах бородууксуйатын тас дойдуга таһаарар көрдөрүүтүн 5 % үрдэттэ, оттон эт уонна үүт бородууксуйата 31 % үрдээтэ, — диэн эбэн эттэ.

Тыа хаһаайыстыбатын миниистирэ Дмитрий Патрушев: «Судаарыстыба көмөтө ааспыт сылга сүҥкэн этэ. Судаарыстыбаннай бырагыраамаларга диэн 318,3 млрд солк. көрүллүбүтэ. Ол 64,2 млрд солкуобайынан ааспыт сыллааҕар элбэх. Ааспыт сыл дохуота 2018 сыллааҕар 13 % үрдээбит»,- диэн бэлиэтээтэ.

Миниистир пандемия бары хайысхалары таарыйбытын курдук тыа хаһаайыстыбатыгар эмиэ ночооту үөскэппитин, ол эрээри, атын хайысханы арыйарга кыаҕы биэрдэ диэн эттэ. Аҕыйах сыл иһигэр тыа хаһаайыстыбата барыс биэрбэт салаа диэн сыыһа өйдөбүлтэн, аныгы, элбэх дохуоттаах бизнес диэн ааттанар буолла диэн Дмитрий Патрушев эттэ.

Хаартыска: РФ Тыатын хаһаайыстыбатын министиэристибэтин саайтыттан.

https://mcx.gov.ru/press-service/photos/itogovoe-zasedanie-kollegii-minselkhoza-rossii-57260/