Бэҕэһээ Үөһээ Бүлүү улууһун дьаһалтатыгар СӨ бырабыыталыстыбатын бэрэссэдээтэлин 1-кы солбуйааччы, СӨ тыа хаһаайыстыбатын уонна ас-үөл бэлиитикэтигэр миниистирэ Петр Алексеев салайааччылаах анал делегация улуус нэһилиэктэрин баһылыктарын кытта көрсөн мунньахтаата.
edersaas.ru
Делегация Ньурбаҕа тохсунньу 25 күнүгэр буолуохтаах тыа хаһаайыстыбатын боппуруостарыгар ыыттыаллыахтаах кэллиэгийэҕэ кыттыаҕа. Петр Алексеев өрөспүүбүлүкэ үрдүнэн тыа хаһаайыстыбатыгар туох үлэ ыытыллыбытын, сыллааҕы түмүктэр тустарынан сиһилии билиһиннэрдэ. Улуус баһылыга Владимир Поскачин Үөһээ Бүлүүгэ тыа хаһаайыстыбатыгар ааспыт сыл түмүктэрин билиһиннэрбитин кэнниттэн
улуус нэһилиэктэрин баһылыктара, бааһынай хаһаайыстыбалар салайааччылара тыа хаһаайыстыбатыгар аналлаах ыйытыылары биэрдилэр, кэккэ боппуруостары туруорустулар.
Баһылыктар төрүүр ынах ахсын көмө харчы көрүллүөхтээҕиттэн саҕалаан угуттаан турар күөллэри түһэриигэ сөптөөх болҕомто уурулларыгар тиийэ туруорустулар. Бары билэрбит курдук, Үөһээ Бүлүү Оҥхойугар уонна Кырыкыйыгар саха сүөһүтүн боруодалара иитиллэ туралларын санатан туран, сөптөөх көмө оҥоһуллара буоллар диэн этиннилэр. Бу сөптөөх этии буолар. Манна ордук хоту улуустарга саха ынаҕын иитэр хаһаайыстыбаларга болҕомто ууруллар эбит. Ити көмөнү ситиһэргэ билиҥҥиттэн үлэни саҕалыырга сүбэлээтилэр.
Өссө биир боппуруоһунан бэтэринээрдэр оҥорор өҥөлөрө сыаналааҕын ыйдылар. Ол курдук үүт анаалыһыттан саҕалаан бэтэринээрдэр араас өҥөлөргө харчы төлөтөллөрүн эттилэр. Онуоха вице-премьер хонтуруолга ылыахпыт диэн эттэ уонна тустаах тэрилтэ салайааччыларын кытта атах тэпсэн олорон быһаарсар сыалтан бааһынай хаһаайыстыбалар төлөөбүт квитанцияларгытын ыыталларын сүбэлээтэ.
Петр Николаевич мунньаҕы түмүктүүр тылыгар улууска тыа хаһаайыстыбатыгар оҥорон таһаарыы систиэмэтин үчүгэйдик аттаран оҥорон, нэһилиэнньэ дохуот аахсарын ситиһии ыытыллыахтааҕын тоһоҕолоон эттэ. Тэрээһин түмүгэр СӨ тыа хаһаайыстыбатын, ас-үөл бэлиитикэтин министиэристибэтэ уонна Үөһээ Бүлүү улууһун дьаһалтата судаарыстыбаннай бүддьүөттэн олохтоох бэйэни салайыныы боломуочуйаларынан тыа хаһаайыстыбатын сайыннарыыга 2018 сылга субвенцияны биэрии Сөбүлэһиитигэр илии баттаһыыта буолла.
Александр Тарасов, edersaas.ru сайтка анаан.