Тыа хаһаайыстыбатын академиятын устудьуоннара Федеральнай Сэбиэт чилиэннэрин кытары көрүстүлэр
Федеральнай Мунньах Федеральнай Сэбиэтин судаарыстыбаннай уонна муниципальнай хонтуруолу тупсарыыга бириэмэннэй хамыыһыйатын чилиэннэрэ ыам ыйын 16 күнүгэр Саха судаарыстыбаннай тыа хаһаайыстыбатын академиятыгар сырыттылар.
edersaas.ru
Көрсүһүүгэ Федеральнай Мунньах Федеральнай Сэбиэтин аграрнай боппуруос, аһынан-үөлүнэн хааччыллыы уонна айылҕаны туһаныы бэлиитикэтигэр Кэмитиэтин бэрэссэдээтэлин солбуйааччы Егор Борисов, бу кэмитиэт чилиэнэ Геннадий Орденов, өрөспүүбүлүкэ Бырабыыталыстыбатын Бэрэссэдээтэлин солбуйааччы Денис Белозеров, тыа хаһаайыстыбатын миниистирэ Александр Атласов, ССТХА ректора, Ил Түмэн дьокутаата Иван Слепцов уо.д.а. кыттыыны ыллылар.
Ыалдьыттар академия научнай-чинчийэр, клинико–диагностическай лабораториятыгар, асчыттары бэлэмниир итиэннэ ресторан бизнеһин үөрэтэр салаалар лабораторияларыгар сырыттылар. Академия преподавателлэрин итиэннэ устудьуоннарын кытары көрүстүлэр.
Ректор Иван Слепцов кылгастык академия үлэтин-хамнаһын, инники былааннарын, устудьуоннар үөрэххэ, чинчийэр үлэҕэ уонна спорка ситиһиилэрин туһунан билиһиннэрдэ. Салгыы тыа хаһаайыстыбатын сайдыытын, судаарыстыба өйөбүлүн дьаһалларын, АПК каадырдарын бэлэмнээһин таһытын үрдэтии, үлэ ырыынагар күрэстэһии о.д.а. тула киэҥ кэпсэтии ыытылынна. Преподавателлэр уонна устудьуоннар АПК-ҕа сыыппара технологиятын киллэрии, модельнай бүддьүөккэ көһүү, салааҕа тахсар саҥа сокуоннар, биопрепараттарга стартаптар тустарынан элбэх ыйытыылары биэрдилэр.
– Истиҥ көрсүһүү иһин махтанабыт, устудьуоннарга үөрэххитигэр итиэннэ инники үлэҕитигэр ситиһиилэри баҕарабыт! Өрөспүүбүлүкэ агро-промышленнай комплексын кэскилэ эһиги илиигитигэр баар, — диэтилэр көрсүһүү түмүгэр Егор Борисов итиэннэ Геннадий Орденов.
Раиса Сибирякова, «Саха сирэ» edersaas.ru