Тыа хаһаайыстыбатын академиятын устудьуоннара Астанаҕа уопут атастаһа тиийдилэр
Саха Судаарыстыбаннай тыа хаһаайыстыбатын академията уонна С.Сейфуллин аатынан Казахскай агротехническэй университет былырыын бииргэ үлэлэһиигэ илии баттаспыттара. Ол дуогабар чэрчитинэн, Саха сирин тустаах үөрэҕин кыһатын устудьуоннара, бу күннэргэ норуоттар икки ардыларынааҕы бырагырааманан Астанаҕа уопут атастаһа тиийдилэр.
Казахскай агротехническэй университет Бырабылыанньатын бэрэссэдээтэлинэн тыа хаһаайыстыбатын наукатын доктора, профессор, Россиятааҕы тыа хаһаайыстыбатын наукатын академиятын академига Ахылбек Кажигулович Куришбаев буолар. Бу университет дойду үрдүк үөрэҕин кыһаларын ортолоругар биир бастыҥнарынан ааттанар итиэннэ норуоттар икки ардыларынааҕы QS рейтининэн аан дойду университеттарын 800 бастыҥнарын кэккэлэригэр сылдьар. Ону таһынан, аан маҥнайгытын үөрэх бырагырааматын хаачыстыбатын национальнай рейтинигэр бэһис миэстэни ылла, индустриальнай-инновационнай сайдыы судаарыстыбаннай бырагырааматын чэрчитинэн, каадыры бэлэмнээһиҥҥэ 10 тирэх университеттар ахсааннарыгар сылдьар.
Казахтар өттүлэриттэн бырайыагы норуоттар икки ардыларынааҕы бииргэ үлэлэһиини сайыннарар киин салайар. Саха сирин устудьуоннарын Астана аэропордугар тустаах Киин дириэктэрэ, педагогическай наука хандьыдаата Салтанат Мейрамова салайааччылаах куратордар уонна факультет салайааччылара көрүстүлэр. Күн бүгүн устудьуоннары уопсайдарга олохтоотулар. СГТХА аатыттан экономическай-правовой уонна гуманитарнай үөрэх департаменын салайааччыта, философскай наука хандьыдаата Алексей Пудов тиийдэ. Бастакы күн сахаларга анаан киэҥ экскурсия тэрилиннэ. Санатан эттэххэ, уопут атастаһыытын быһыытынан, СГТХА-ҕа бу күннэргэ казах устудьуоннара кэлиэхтэрэ.
Саха судаарыстыбаннай тыа хаһаайыстыбатын академиятын уопсастыбаннай коммуникацияҕа салаата.