Биир кэлим эксээмэннэр түмүктэнэн, оҕолор оскуоланы бүтэрэн, бэйэлэрин инники олохторугар улахан хардыы оҥорор эппиэтинэстээх кэмнэрэ тиийэн кэллэ. Дьокуускайдааҕы тыа хаһаайыстыбатын академията от ыйын 3 күнүгэр медиакииҥҥэ абитуриеннарга, төрөппүттэргэ уонна сэҥээрэр-сэргиир тэрилтэлэргэ аналлаах төгүрүк остуол ыытта.
Остуол тула олорон бу үөрэх исписэлиистэрин хаачыстыбаларын таһымын үрдэтиитин, туох саҥа уларыйыылар киирбиттэрин, үөрэх таһымын, хайдах үлэлии-хамныы сылдьалларын туһунан сибээстээх кэпсэтиилэр бардылар.
Абитуриеннар докумуоннарын тутар хамыыһыйа үлэтин бэс ыйын 15 күнүттэн саҕалаабыт. Биэс факультет, биир филиал, ону тэҥэ кэллиэс докумуоннары тутар. Ол курдук, быйылгы 2019-2020 үөрэх дьылыгар 1500 устудьуон босхо миэстэҕэ тиксэр кыахтаах, онтон 770 – Арассыыйа бүддьүөтүн, 70 – Саха сирин бүддьүөтүн миэстэлэрэ буолаллар. Быйылгы дьылга хас да саҥа салаа арыллыбытын туһунан бэлиэтээтилэр. Ол курдук, ландшафтнай архитектура, информационнай эйгэ систиэмэтин технологията (информационные системы технологий), магистратура программатыгар — мас соҕотуопката уонна таҥастааһын ньымата быйылгыттан үлэлиэхтэрэ. Ону тэҥэ, технология уонна салайыы кэллиэһигэр быйылгыттан 9-с кылаас кэнниттэн оҕолор туттарсар кыахтаннылар.
Сүрүн ирдэнэр докумуон — аттестат, орто үөрэх кэнниттэн туттарсааччылартан диплом, хаартыска, паспорт, испииһэккэ сөп түбэһэр идэлэринэн медкөрүү. Ол эрэн үксүн медкөрүү оннугар, судургутутан флг көрдүүллэр.
Академия устудьуоннара бырагырааманан араас дойдуларга баран үөрэнэр кыахтаналлар. Ол туһунан бүгүн устудьуоннар абитуриеннарга кэпсээтилэр.
Ратибор Матвеев, тыа хаһаайыстыбатын устудьуона:
—Ставропольетааҕы аграрнай университет биһигини олус эйэҕэстик көрсүбүтэ. Үөрэхтэрэ уратылаах. Хас ый аайы эксээмэн туттарар этибит. Өссө бастыҥ үлэлээх тыа хаһаайыстыбаларыгар тахсан үлэлэһээччибит. Туттар тэриллэрэ сөхтөрдүлэр. Барыта Европа ирдэбилигэр эппиэттиир оҥоһуулар, аптамаатынан үлэлииллэр. Маны таһынан, кэмпириэнсийэлэргэ кыттааччыбын.
Иван Слепцов, Дьокуускайдааҕы тыа хаһаайыстыбатын академиятын ректора:
—Биһиги үөрэхпит салаалара произодствоны, экэниэмикэни кытта сибээстээхтэр. Производство диэн экономика, экономика диэн дьон олоҕо, биэнсийэ, хамнас, үп-харчы. Үөрэнэ сылдьар устудьуоннарга тулууру баҕарабын. Үөрэхтэригэр хара саҕаланыаҕыттан кыһаллыахтарын наада. Билиҥҥи кэмҥэ тугу да билбэт, тугу да сатаабат киһини үлэҕэ ылаллара ыарахаттардаах. Аахайан үөрэммэтэх киһи бэйэтин дьыалатын да арынарыгар ыарахаттары көрсүөн сөп. Биһиэхэ үөрэнэр оҕолор кэмсиммэттэр. Онон кэлиҥ, үөрэниҥ. Сайдыылаах, билиилээх дьон буола үүнэргит туһугар, барытын тэрийиэхпит.
Виктория ПОПОВА
Петр Матвеев хаартыскаларга түһэриитэ