Ил Дархан Айсен Николаев билигин тыа хаһаайыстыбата ураты болҕомтону ирдиирин, бу эйгэҕэ эбии үбүлээһин барыаҕын, дьиэ кэргэн экэниэмикэтин сайыннарыыга көмө көрүллүөҕүн туһунан бүгүҥҥү мунньаҕар иһитиннэрдэ.
– Билиҥҥи быыһык кэмҥэ тыа хаһаайыстыбатын бородууксуйатын оҥорон таһаарааччыларга ураты болҕомто ирдэнэр. СӨ бырабыылатыстыбата бу эйгэҕэ салгыы туох көмө барыаҕын туһунан өссө биирдэ ырытан көрүөҕэ. Манна биири бэлиэтиибин, “Туймаада” хампаанньаҕа быйылгы бүддьүөттэн көрүллүбүт 600 мөлүйүөн солкуобай дьиэ кэргэн экэниэмикэтин сайыннарыыга, кууруссаны, сибиинньэни иитиигэ, о.д.а. эйгэлэри сайыннарыыга барыахтаах. Итини таһынан тыа хаһаайыстыбатын тэрилтэлэрэ комбикорму ылыыларыгар 358 мөлүйүөн солкуобай барыаҕа, 88-тан тахса мөлүйүөн солкуобай ыһыы үлэтигэр көрүлүннэ, – диэн бэлиэтиир Айсен Сергеевич.
Аска-үөлгэ сыана боппуруоһун туһунан этэригэр кини сыананы бас-баттах үрдэтэ турар сатамматын, итини судаарыстыба хонтуруолга ылбытын иһитиннэрдэ.
– Билиҥҥи баар балаһыанньанан туһанан сорохтор туох да быһаарыыта суох бас-баттах сыананы үрдэтэ тураллар. Ити судаарыстыба өттүттэн, чуолаан туһааннаах уорганнар өттүлэриттэн, күүскэ хонтуруолланыахтаах. Бүгүҥҥү туругунан, прокуратура сыананы олоҕо суохтук үрдэтиигэ 58 дьыаланы көбүттэ, – диэн бэлиэтиир Айсен Николаев.
Аграфена КУЗЬМИНА