Тыа хаһаайыстыбатыгар сүрүн көрдөрүүлэр сэмэйдэр эрээри, сорук улахан...
Олох-дьаһах

Тыа хаһаайыстыбатыгар сүрүн көрдөрүүлэр сэмэйдэр эрээри, сорук улахан

Бүгүн, тохсунньу 22 күнүгэр, Бырабыыталыстыба 2-с №-дээх дьиэтигэр Тыа хаһаайыстыбатын министиэристибэтин кэллиэгийэтин киэҥ ыҥырыылаах мунньаҕа буолла. Бырабыыталыстыба бэрэссэдээтэлин солбуйааччы Денис Белозеровтан, Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкинтан саҕалаан улуустар баһылыктара, улуустардааҕы тыа хаһаайыстыбатын управлениеларын уонна АПК тэриллиилэрин салайааччылара, барыта 100-чэ киһи, кытынна.


Бастакынан тыа хаһаайыстыбатын миниистирэ Александр Атласов “2012-2020 сылларга тыа хаһаайыстыбатын сайыннарыы итиэннэ тыа хаһаайыстыбатын бородууксуйатын, сырьетун уонна аһын-үөлүн ырыынактарын сүрүннээһин” СӨ судаарыстыбаннай бырагырааматын олоххо киллэрии 2018 сыллааҕы түмүгүн уонна 2019 сылга соруктарын туһунан дакылаатын иһиттилэр.

Онтон хос иһитиннэриини тыа хаһаайыстыбатыгар үчүгэй көрдөрүүлээх Чурапчы улууһун баһылыга Андрей Ноговицын, Анаабыр улууһун баһылыга Иван Семенов уонна Ньурба улууһун баһылыгын бастакы солбуйааччы Артур Яковлев оҥордулар. Кинилэр чопчу тыа хаһаайыстыбатыгар улуус өттүттэн туох үлэни ыыталларын билиһиннэрдилэр уонна баҕа санааларын эттилэр. Холобур, Чурапчыга саҕалааччы фермери өйүүр уонна бааһынай хаһаайыстыба базатыгар дьиэ кэргэн ферматын сайыннарар тосхоллоох бырагыраамаларынан улуус таһыттан 25 эдэр ыал олохсуйан үлэлии сылдьар. Ньурбаҕа үүт харчытыгар улуус бүддьүөтүттэн 5-тии солкуобайы эбии биэрбиттэр.

Дакылаат сүнньүнэн кэпсэтиигэ Өлүөхүмэ улууһун баһылыга Виктор Васильев маҥнайгынан тыл ылан: “Улууспут иһигэр бэйэбит уотурба оҥостобут. Үөһэттэн көмө көрүлүннэр, кээмэйин улаатыннаран, Ленскэйи уонна Бүлүү улуустарын хааччыйыахпытын сөп. Итиэннэ батарыыта быһаарыллара буоллар, хортуоппуйбутун икки төгүл элбэтэр кыах баар”, — диэтэ. Уопсастыбаннай Палата чилиэнэ Иван Горохов уонна уопсастыбанньык Роман Барашков тордуохтаах ыйытыыларыгар миниистири сэргэ миниистири бастакы солбуйааччы Татьяна Осипова уонна Денис Белозеров бэйэтинэн хоруйдастылар.

ТХМ кэллиэгийэтин мунньаҕа “Тыа хаһаайыстыбатын сайыннарыы туһунан” СӨ сокуонун олоххо киллэрэр инниттэн муниципальнай оройуоннары кытта бииргэ үлэлиир туһунан Сөбүлэһиигэ илии баттаһыынан түмүктэннэ. Бу суолталаах докумуоҥҥа Амма, Өймөкөөн, Кэбээйи, Чурапчы, Анаабыр, Аллайыаха, Мэҥэ Хаҥалас, Нам, Таатта, Өлүөхүмэ, Дьааҥы улуустарын баһылыктара илии баттаатылар.

Василий НИКИФОРОВ, «Саха сирэ» хаһыат, edersaas.ru

 

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

пятнадцать − шесть =