Тыа хаһаайыстыбатыгар үлэлиир эдэр исписэлиистэргэ эбии төлөбүр оҥоһуллар
«Каадыр барытын быһаарар» диэн мээнэҕэ этиллибэт.
edersaas.ru
Өрөспүүбүлүкэ салалтата тыа хаһаайыстыбатыгар үлэлиир каадыры олохсутууга үгүс хайысхалаах өйөбүлү оҥорор. Ол курдук, хаһаайыстыбаҕа үс сыл устата үлэлииргэ дуогабардаспыт алын сүһүөх, орто анал уонна үрдүк анал үөрэҕи бүтэрбит эдэр исписэлиистэргэ ый аайы эбии төлөбүр көрүллүүтэ буолар. Хаһаайыстыба биэрэр хамнаһын таһынан, үрдүк үөрэхтээх эдэр исписэлиискэ 22 500, орто анал үөрэхтээххэ 16500, алын сүһүөх анал үөрэхтээххэ 12 000 солк. бүддьүөттэн бэриллэр. Онуоха кинилэр үс сыл үлэлииргэ кэпсэтэн, тустаах хаһаайыстыбаны итиэннэ Тыа хаһаайыстыбатын министиэристибэтин кытары үс өрүттээх дуогабар түһэрсэллэр. Ил Дархан Айсен Николаев ыйааҕын быһыытынан, бу сыл от ыйын 1 күнүттэн таба хаһаайыстыбаларыгар үлэлиир 81 эдэр исписэлиис маннык эбии төлөбүрү ылаллар. Бу дьонтон үрдүк анал үөрэхтээҕэ алта, орто анал үөрэхтээҕэ үс, атыттара алын сүһүөх анал үөрэхтээхтэр. Таба хаһаайыстыбалара табаны иитии технологиятын салайар-сүрүннүүр исписэлиистэргэ, зоотехниктарга, ордук наадыйаллар.
Өйөбүл иккис көрүҥэ “Эдэр табаһыт” социальнай бырагыраама буолар. Бу бырагыраама былырыын “Саха сирин Арктикатааҕы түбэтин уонна төрүт олохтоох аҕыйах ахсааннаах хотугу норуоттар 2020-2024 сс. социальнай-экэнэмиичэскэй сайдыылара” эрэгийиэннээҕи судаарыстыбаннай бырагыраама чэрчитинэн оҥоһуллубута. Ыстаадаҕа эдэр дьон үлэлии кэлэрин көҕүлээн, 35-гэр диэри саастаах табаһыт дьиэ-уот туттарыгар биир мөлүйүөн солкуобай бэриллэр. Кубуота көрүллэн, 11 эдэр табаһыт бу көмөнөн туһанна. Ураты уустук усулуобуйаҕа үлэлиир дьоҥҥо кубуота сылтан сыл эбиллэн иһэригэр эрэнэбит.
Раиса Сибирякова, «Саха сирэ» хаһыат, edersaas.ru