Чурапчылар тугу биһирээбиттэрий? Манна ааҕыҥ.
Чурапчы улууһун баһылыгын үгэскэ кубулуйбут отчуота быйыл онлайн эрэсииминэн инстаграм-ситиминэн уонна ZOOM нөҥүө ааста. Улуус олохтоохторо отчуокка көхтөөхтүк кыттан, араас ыйытыылары биэрдилэр. Отчуокка кыттыбыт улуус улахан нэһилиэктэриттэн биирдэстэринэн Хатылы сэлиэнньэтэ буолар. Бу нэһилиэк баһылыга Ульяна Атласова ыытыллыбыт отчуот тула санаатын маннык үллэһиннэ:
— Быйыл отчуот онлайн-эрэсииминэн буолла. Тэрээһиҥҥэ биһиги нэһилиэктэн 132 киһи кытынна. Кинилэр быһа эфиргэ социальнай ситимнэринэн холбоммуттара. Ааспыт сылларга тэҥнээтэххэ, отчуокка нэһилиэнньэ аҥаарыттан ордуга кытынна.
Нэһилиэк сайдыыта муниципальнай оройуон ыытар бэлиитикэтиттэн тутулуктааҕа чахчы. Урукку сыллары билиҥҥини кытары тэҥнээтэххэ, улуус 17 нэһилиэгин сытыы кыһалҕалара былааннаахтык уонна тиһиктээхтик быһаарылыннылар. Бу Андрей Ноговицын баһылыктаах оройуон дьаһалтатын үтүө өрүтэ буолар.
Анаан-минээн ”Дьиэҕэр олор — дьиэ кэргэн экэниэмикэтинэн дьарыктан” улуус бырагырааматын туһунан этиэхпин баҕарабын.
Бу бырагырааманы улуус салалтата олох кэмигэр ылыммыт диэн сыаналыыбын. Бырагыраама көмөтүнэн нэһилиэктэр олохтоохторо ыал экэниэмикэтин сайыннарыыга көхтөөхтүк кытыннылар. Хамсык эрэ кэмигэр буолбакка, дьон дохуот аахсалларыгар көмөлөстө. Биһиги нэһилиэкпит эмиэ бу үлэҕэ көхтөөхтүк кытынна. Өрөспүүбүлүкэ баһылыга Айсен Николаев тыа сирин ыалларыгар сылдьан, бу бырайыак кэмигэр олох сөпкө ылыллыбытын бэлиэтээбитэ да элбэҕи этэр.
Оттон чопчу тыа хаһаайыстыбатын сайдыытыгар тохтоотоххо, улууспут дьаһалтата быар куустан олорбото. Маныаха улуус баһылыгын сүҥкэн оруолун ааттыахха сөп. Кини тыа хаһаайыстыбатын сайыннарыыга саҥа суоллары көрдүүр. Нэһилиэк олохтоохторо улууска Тыа хаһаайыстыбатын сайдыытын агентствотын тэрийиини биһирээтилэр. Бу көмөтүнэн тыа сирин олоҕо-дьаһаҕа тупсарын туһугар кэтэх биисинэс сайдыахтаах. Уонна тыа хаһаайыстыбатынан дьарыктанааччыларга үп-харчы, юридическай, биисинэс-былааннааһын уонна IT өттүгэр өҥөлөрү оҥорууга көмөлөһүөхтээх.
“Чурапчы улууһа” МТ пресс-сулууспата
Бэлэмнээтэ Женни Стрюкова
Хаартыска: тустаах саайтан