Хаардаах дойдуга олорор уратыбытын кэнники сылларга кэрэни кытта ситимнээн, олус бэркэ туһанар буоллубут. Холобур, Саха сиригэр биллэр ааттаах-суоллаах урбаанньыт Руслан Федотов хаар искусствотын тыа хаһаайыстыбатын, ордук тиэхиньикэни кытта ситимниир. Ол мээнэҕэ буолбатах. Руслан Еремеевич «Амма» сопхуос тимир тиһиликтээх тиэхиньикэлэрин айааһаан, үлэҕэ бастакы хардыыларын саҕалаабыта.
Кини күн бүгүн Арассыыйа бөдөҥ хампаанньаларын кытта быһаччы үлэлэһэн, Саха сирин тыатын хаһаайыстыбатын тиэхинньикэнэн толору хааччыйан олорор урбаанньыт. Руслан Еремеевич үлэ үөрүйэхтэрин иҥэриммит тэрилтэтэ — «Амма» сопхуос иннин диэки эрэллээхтик хардыылыырыгар, атаҕар турарыгар бары кыаҕын, сатабылын уурар. Ааһан эрэр 2017 сылга онуоха туһуламмыт хас да өрүттээх үлэни ыытан кэллэ.
Тыа сирин олоҕун уйгута тиэхиньикэттэн улахан тутулуктаах. Улахан кыамталаах тыраахтардар тыа сирин олоҕун-дьаһаҕын уһансар төһүү күүһүнэн буолаллар. Урбаанньыт Руслан Федотов ити толкуйу Саҥа дьылы кытта ситимнээн дьонугар-сэргэтигэр иҥэрэр, үйэтитэр биир үтүө соруктаах.
Былырыын Аллараа Бэстээххэ, маҕаһыынын тэлгэһэтигэр, хаарынан бэйэлэрин кээмэйдэринэн оҥоһуллубут икки МТЗ-82 тыраахтар дьон-сэргэ сөҕүүтүн-махтайыытын ылыан ылбыта. Онтон быйыл тыа сиригэр үөскээн, үүнэн тахсыбыт дьон эрэ барыта бэркэ өйдүүр ДТ-75 тыраахтарын хаарынан оҥорон, чочуйан таһаардылар. Маны сэргэ, Руслан Федотов маҕаһыынын аттыгар хаарынан оҥоһуллубут массыына сыл бэлиэтин – ыты тиэйэн иһэрэ эмиэ баар.
— Бу тыа хаһаайыстыбатыгар үлэлээн ааспыт, билигин да тиритэ-хорута сыралаһар дьоммор-сэргэбэр махтанан, кинилэр уустук үлэлэригэр сүгүрүйэн туран анаабыт бэлэҕим буолар. Кэлэн иһэр Саҥа дьыл барыбытыгар ситиһиилээх буоллун. Тыа хаһаайыстыбатыгар үлэлиир хас биирдии дьоҥҥо таһаарыылаах үлэни, доруобуйаны баҕарабын, — диэн урбаанньыт Руслан Федотов махталын, эҕэрдэтин тиэрдэр.
Биһиги корр., «Саха сирэ» хаһыат, edersaas.ru