Бэҕэһээ СӨ Бырабыыталыстыбатын 2 №-дээх дьиэтигэр Саха Өрөспүүбүлүкэтин бааһынай хаһаайыстыбаларын уонна кэпэрэтииптэрин ассоциациятын отчуоттуур-быыбардыыр кэмпириэнсийэтэ буолла. Кэмпириэнсийэ дэлэгээттэрэ ассоциация бэрэсидьиэнинэн А.Е.Артемьевы хаттаан таллылар.
Кэмпириэнсийэҕэ ассоциация инникитин ханнык соруктары быһаарыыга үлэлэһиэхтээҕин чопчулаатылар. Сайдыы суолларын, бастыҥ уопуту кэпсээтилэр, итэҕэһи-быһаҕаһы да ыйдылар.
Егор Иванов (Ньурба):
— Бааһынай хаһаайыстыба үлэһиттэрин социальнай өттүнэн өйөөһүҥҥэ ассоциация үлэлэһэрэ буоллар. Ол курдук, пиэрмэр үлэтэ эдэр дьону тардыбат буолла, бу салааҕа орто саас- 50 саас. Биэнсийэ таһыма эппиэттэспэт. Хамсык иннинэ санаторийынан-куруордунан туһаныыга бааһынай хаһаайыстыбатын баһылыга бырайыаһынан туһаммат диэн баара. Ол билигин хайдах быһаарыллыбыта буолла? Биир күн өрөбүлэ суох үлэлиир дьону өйүөххэ.
Станислав Семенов (Сунтаар):
- — Александр Артемьев рационализатор быһыытынан кыахпын арыйбыта. Айар-тутар киһи сайдар эбит. Онон мэхэньисээтэрдэргэ, рационализатордарга болҕомтобутун ууруохха. Тырахтарыыстар олох аҕыйаатылар. Олоҕу кытта тэҥҥэ хардыылаатахха тыа хаһаайыстыбата сайдар кыахтаах эбит. Сунтаарга сир үлэтэ күүскэ баран эрэр. Эдэр ыччаты түмүүгэ үлэ барда. Кэтэх дьон сир оҥостон эрэллэр. Туох саҥаны билэрбитин дьоҥҥо кэпсээн тарҕатыаҕыҥ.
Николай Кузьмин (Амма, Олом Күөлэ):
— Билигин дьон тыа хаһаайыстыбата абырыа диэн толкуйдуур буолла. А.Артемьев саха ынаҕын тэрилтэтин салайыаҕыттан үлэ бөҕөнү ыытта. Миигин саха ынаххын атыылаа диэн хаамтарбат буоллулар. Тус бэйэм сүөһү төбөтүгэр 35 тыһ. биэрэллэрин сөп диибин.
Петр Дьяконов (Кэбээйи):
- — Биһиэхэ, туох да кистэлэ суох, үлэлии кэлээччилэр барар сирдэрэ баҕана үүтэ буолбуттар кэлэллэр. Билигин үөрэх систиэмэтэ олох сыыһа дии саныыбын. Сэбиэскэй кэмҥэ оҕо оскуола кэнниттэн производствоҕа үлэлии тахсара. Дьиҥэ, улааппыт оҕону производствоҕа сыһыарар ыарахан. Кэтээн көрдөхпүнэ, 5-6 кылааска оҕолор олох үчүгэйдик үлэлииллэр эбит. Уонна ити үлэлээбит оҕолор оскуола кэнниттэн хаалан, олус бэркэ үлэлээччилэр. “Куһаҕаннык үөрэниэҥ – хотоҥҥо барыаҥ” диэн өйдөбүл дьон өйүттэн арахпат эбит баччааҥҥа диэри.
СӨ тыа хаһаайыстыбатын миниистирэ Александр Атласов үүт соҕотуопкатын, сир оҥоруутун, хаһаайыстыбалары хортуоппуй, бурдук сиэмэтинэн хааччыйыыга тохтоото. Үүт сыаната бүгүн биллиэхтээх диэн кэтэһэбит диэтэ. Тыа хаһаайыстыбатын миниистирин солбуйааччы Николай Афанасьев быйылгы дьылга миэстэтигэр оттуурга быһаарбыттарын эттэ. Кини бааһынай хаһаайыстыбалар грант ылар саҕана сирдээхпит диэн кэлэллэрин, ылан баран сирбит тиийбэт дииллэрин сэмэлээтэ. “Агростартапы” биэрэн баран ыччаты кытта үлэлэһиэххэ, кинилэри дьиҥнээхтик үлэлэтиэххэ”, — диэтэ кини чопчу.
СӨ бырабыыталыстыбатын бэрэссэдээтэлин солбуйааччы Михаил Никифоров ассоциация чилиэннэрин үгүс ыйытыыларыгар хоруйдаата. Кини тыа хаһаайыстыбатыгар ыччаты таһаарыахха, каадырдары бэйэбит иитэн таһаарар курдук дьаһаныахха диир. “Тыа хаһаайыстыбатын биисинэс, дохуоппут курдук көрөн, оннук санаанан үлэлэтиэхтээхпит”, — диэн сүбэлээтэ. Ты ахаһаайыстыбатын өйөөһүҥҥэ сорох мэхэньиисимнэр уларыйан эрэллэрин эттэ. “Агростартапка” тыраахтар ылаары эрэ киирээччилэр баалларын эмиэ сэмэлээтэ. Үлүгэрдээх үп оту тиэйиигэ барбытын санатан туран, быйыл манна оттуохтаахтарын өссө төгүл тоһоҕолоон бэлиэтээтэ.
Ити курдук, ассоциация кэмпириэнсийэтигэр үгүс санаа этилиннэ.
Бэлэмнээтэ Женни Стрюкова
Хаартыска:ааптар