Тохсунньу 1 күнүттэн тыа хаһаайыстыбатыгар 30 сылтан кырата суох кэмҥэ үлэлээбит дьон страховой биэнсийэлэригэр бигэргэммит төлөбүрдэрэ 25% үрдүүр. Ол ыйга 1333 солкуобай 55 харчыга тэҥнэһэр.
edersaas.ru
Бу эбии төлөбүрү ыларга 3 ирдэбиллээх: биэнсийэлээх тыа хаһаайыстыбатыгар 30 сыл үлэлээбит, тыа сиригэр олохсуйан олорор уонна билиҥҥи кэмҥэ үлэлээбэт буолуохтаах.
Ханнык хайысханан, туох дуоһунаска үлэлээбит дьон ылалларый? Ону чопчулуурга РФ бырабыыталыстыбатын 2018 сыл сэтинньи 29 күнүнээҕи 1440 №-дээх уурааҕа тахсыбыта.
- Үүнээйини, оҕуруот аһын олордуу: агроном, агрохимик, агротехник, бахчевод, биригэдьиир, суоппар, тырахтарыыс, комбайнер, кылаабынай инженер, салайааччы (бэрэссэдээтэл, дириэктэр), салайааччыны солбуйааччы, гидромелиоратор, кылаабынай механизатор, кылаабынай энергетик, слесардар, оробуочай, управляющай, звеньевой, сэбиэдиссэй, чинчийээччи-селекционер, машинист, үүнээйини үүннэрии маастара, тутуу сыаҕын маастара, тиэхиньикэни өрөмүөннүүр үлэһит, оператор, холкуос, сопхуос чилиэнэ, энтомолог, уо.д.а.
- Сүөһүнү, хамсыыр-харамайы иитии: биригэдьиир, бэтэринээр, бэтэринээринэй сулууспа бактериолог-бырааһа, биэлсэрэ, санитара, бэтэринээр-техник, суоппар, кылаабынай инженер, сыах начаалынньыга, бааһынай хаһаайыстыба салайааччылара, солбуйааччылара, животновод, ыанньыксыт, сүөһүнү көрөөччү, оператор, техник, технолог, ыҥырыаны иитээччи, тырахтарыыс, машинист, управляющай, бааһынай хаһаайыстыба үлэһитэ, ихтиолог, балыгы үөскэтээччи, балык артыалын үлэһитэ, зоотехник, кылаабынай инженер, механизатор, токарь, слесарь, моторист, электрик, күндү түүлээҕи иитээччи, мелиоратор, уо.д.а.
- 1992 сылга диэри холкуостарга, сопхуостарга, МТС-тарга, бааһынай хаһаайыстыбаларга үлэлээбит дьон (идэтиттэн, дуоһунаһыттан тутулуга суох).
Бу хайысхаларынан уопсайа 30 сылтан кырата суох кэмҥэ үлэлээбит биэнсийэлээх докумуоннарын 2019 сыл бүтүөр диэри Биэнсийэ пуондатын управлениетыгар аҕаллаҕына, эбии төлөбүр бу сыл тохсунньутуттан ааҕыллар, хаттаан ааҕыы (перерасчет) оҥоһуллар. Кини 2019 сыл ахсынньы 31 күнүттэн хойутаатаҕына, эбии төлөбүрү хаттаан аахпакка, кэлэр ыйтан ылан барар.
Биэнсийэ пуондатын Саха сиринээҕи салаата иһитиннэрбитинэн, өрөспүүбүлүкэҕэ бу 3 ирдэбилгэ сөп түбэһэр киһи аҕыйах эбит. Холобур, Ньурба куорат буолан, манна олорор киһи хапсыбакка хаалар. Билиҥҥитэ өрөспүүбүлүкэ үрдүнэн 2800 кэриҥэ киһи ылыан сөп диэн сабаҕалыыллар.
Ангелина Васильева, «Саха сирэ» хаһыат, edersaas.ru