Бу күннэргэ 3 №-дээх өрөспүүбүлүкэтээҕи интенсивнай терапия реанимациятын отделениетыгар тыҥа искусственнай вентиляциятын аныгы аппарааттарын туруордулар.
edersaas.ru
Бу үрдүк технология хаачыстыбатынан оҥоһуллубут Dräger Savina, Philips Respironics V60, Mindray SV300 аппарааттар туттарга олус табыгастаахтарын туһунан анестизиолог-реаниматолог быраас Акулина Федотова бэлиэтиир.
— Аныгы аппарааттар кырдьаҕас дьон тыҥаларын эмтииргэ улахан көдьүүстээх тэриллэр. Онон бу сыстыганнаах коронавирус пандемиятын кэмигэр туттарга олус наадалаах тэрилинэн хааччыйбыттарыгар балыыһа кэлэктиибэ тэрилтэбит салалтатыгар, бырабыыталыстыба уонна доруобуйа харыстабылын министиэристибэтигэр барҕа махталбытын тиэрдэбит. Гериатрия киинин ыарахан ыарыһахтарыгар анаан алта реанимациялыыр миэстэ тэрийбиппит. Билигин инфекционнай стационар быһыытынан үлэлиир балыыһаттан ахсынньы ортотунааҕы чахчынан 900 ыарахан туруктаах ыарыһах үтүөрэн таҕыста. Саамай кырдьаҕас үтүөрбүт ыарыһах, Аҕа дойду Улуу сэриитин бэтэрээнэ 97 саастаах этэ, — диэн анестизиолог-реаниматолог быраас Акулина Федотова СИА-ҕа иһитиннэрдэ.
Елена ПОТОЦКАЯ, «Саха сирэ» хаһыат, edersaas.ru
Хаартыска — СИА.