“Саха сүөһүтэ” генопуонда хааһына тэрилтэтин салайааччы Александр Артемьев быйыл, ыам ыйын 15 күнүгэр, Москва уобалаһын Подольскайыгар баар академик Л.К.Эрнст аатынан “Сүөһү иитиитин научнай-чинчийэр киинэ” федеральнай судаарыстыбаннай бүддьүөт научнай тэрилтэтин (ВИЖ) дириэктэрэ Наталья Зиновьеваны кытары бииргэ үлэлээһин дуогабарын түһэрсибитэ.
edersaas.ru
Дуогабарга аан дойду араас боруода сүөһүлэриттэн саха сүөһүтэ дэҥҥэ көстөр ураты хаачыстыбаларын (тымныыны тулуйарын, хаанын ураты састаабын, кыра аһылыгынан элбэх бородууксуйаны биэрэрин, ыарыыга ылларбатын, туйаҕа бөҕөтүн, этэ-үүтэ киһи доруобуйатыгар туһатын) чорботон, ону атын култуурунай боруода селекциятыгар, генетикаҕа, доруобуйа харыстабылын наукатыгар туһанар сыалтан дириҥник үөрэтэргэ этиллибитэ.
Ол иһин ВИЖ-тэн бэрэстэбиитэл кэлэн, “Саха сүөһүтэ” генопуонда хааһына тэрилтэтин Горнайдааҕы салаатыттан алта тыһы тыһаҕаһы массыынанан тиэйэн, Подольскайга илдьэ барбыта. «Саха сүөһүтэ» ГТХ үлэһиттэрэ төрүт сүөһүлэрбит ыраах сиргэ этэҥҥэ айанныылларын туһугар, Кылыс сайылыкка Ынахсыт сэргэтин таһыгар Үрдүкү Айыылартан үҥэн-сүктэн, сиэри-туому тутуһан атаарбыттара. Ити от ыйын 10 күнүгэр этэ.
От ыйын 26 күнүгэр тыһаҕастар Подольскайга этэҥҥэ тиийбиттэрин туһунан иһитиннэрии кэллэ. Арыаллаан илдьибит ВИЖ исписэлииһэ Давлят төлөпүөнүнэн кэпсээбитинэн, ынахтарбыт барахсаттар 700 көс усталаах айаҥҥа улаханнык илистибэтэхтэр, мантан илдьэ барбыт биир урулуоннаах (250 киилэ) отторугар эбии аара биир урулуону эрэ атыыласпыттар итиэннэ куйааһа бэрдиттэн күҥҥэ иккитэ, сороҕор үстэ уулаппыттар. Ыыппыт видеоларынан көрдөххө, тыһаҕастар кырдьык, көрүҥнэрэ үчүгэй эбит.
Раиса Сибирякова, «Саха сирэ» хаһыат, edersaas.ru