Дьокуускайдааҕы оҕо киинин педагога Арассыыйатааҕы куонкуруска боруонса мэтээли ылла
Балаҕан ыйын 16 күнүгэр оҕону уонна ыччаты кытта үлэлиир исписэлиистэр идэлээх маастарыстыбаларыгар Бүтүн Арассыыйатааҕы куонкурус түмүгэ “Росдетство” сайтыгар таҕыста. Манна Дьокуускайдааҕы оҕо киинин педагога, “Одун” этнокултуурунай киин уонна норуодунай ансаамбыл салайааччыта Туяра Колодезникова боруонса мэтээли ылары ситистэ. Куонкуруска култуура, искусство, спорт, үөрэх, ыччат дьыалаларыгар уорганнар, оскуола иннинээҕи тэрилтэ, оскуола, эбии үөрэхтээһин уо.д.а. исписэлиистэрэ кытыннылар.
Куонкурус ааспыт сыл алтынньытыгар саҕаламмыта, үс түһүмэҕинэн ыытылынна – сүүмэрдиир түһүмэх, полуфинал уонна финал. Сүүмэрдиир түһүмэҕи 157 исписэлиис ааста. Бу дьонтон полуфинал сорудахтарын эндэппэккэ толорон, 12 киһи финалга тахсыбыта. Финалистар эспиэрдэргэ бэйэлэрэ толкуйдаабыт үөрэтэр бырагыраамаларын интэриниэт-канаал нөҥүө көмүскээбиттэрэ. Манна Туяра Колодезникова “Путь к гармонии” диэн комплексын билиһиннэрбитэ. Бу комплекс биир сүрүн уратытынан хас даҕаны үөрэхтээһин ньыматын бииргэ түмүү буолар. Маныаха хас биирдии ньыма бэйэтэ туспа сыаллаах-соруктаах, оҕо сөпкө сайдарыгар туһуланар. Бу үөрэтии өрөспүүбүлүкэ норуоттарын фольклорун көрүҥнэригэр уонна норуот уус-уран айымньытыгар олоҕурар.
Куонкурус түмүгэр Гран-при, кыһыл көмүс, үрүҥ көмүс уонна боруонса мэтээллэр, лауреаттар, призердар бэлиэтэннилэр. Туяра 0,5 баалынан үрүҥ көмүстэн хаалан, уопсайа 57 бааллаах боруонса мэтээл хаһаайката буолары ситистэ.
Туяра араас Арассыыйатааҕы, норуоттар икки ардыларынааҕы куонкурустарга ситиһиилээх кыттыытын, СӨ норуоттарын национальнай култууратын көхтөөхтүк тарҕатыытын иһин СӨ бэрэсидьиэнин стипендиатынан, 2009 с. уонна 2012 с. “Саха-Азия оҕолоро” норуоттар икки ардыларынааҕы пуонда лауреатынан, 2004 с., 2010 с., 2011 с. СӨ бырабыыталыстыбатын гранын хаһаайынынан уонна да араас таһымнаах граннар, куонкурустар кыайыылааҕынан буолар.
Туяра 2018 сылтан Дьокуускайдааҕы оҕо киинигэр Ыччат дьыалаларыгар федеральнай ааҕыныстыба уонна Роскультцентр өйөбүллэринэн “Путь к гармонии” диэн оҕо этнокултуурунай киинин тэрийэргэ инновационнай бырайыагынан дьарыктанар. Туяра салалтатынан “Одуҥҥа” 500-чэ оҕо дьарыктанар. Билигин кини иитиллээччилэрин кытта “Орленок” кииҥҥэ Арассыыйа норуоттарын култуураларын бэстибээлигэр кытта сылдьар.
“Одун” киин уонна ансаамбыл, “Кэнчээри” дьиэ кэргэн кулуубун аатыттан Туяра Колодезникованы улахан ситиһиитинэн эҕэрдэлиибит уонна инники үлэҕэр ситиһиилэри баҕарабыт.
“Одун” оҕо этнокултуурунай киинин, норуодунай ансаамбылын кэллэктиибэ
уонна Дьокуускайдааҕы оҕо киинин “Кэнчээри” дьиэ кэргэнин кулууба.