Дьокуускайга А.Е.Кулаковскай аатынан норуоттар доҕордоһууларын дьиэтигэр СӨ төрүт олохтоох аҕыйах ахсааннаах хотугу норуоттарын VI аһаҕас бэстибээл-куонкурустара буолла. Бырайыак сыала — эбэҥки, эбээн, дьүкээгир, долган норуоттарын тылларын харыстааһын, үөрэтии, тарҕатыы. Тэрээһин туһунан сиһилии норуоттар доҕордоһууларын дьиэтин пресс-сулууспата иһитиннэрдэ.
Өрөспүүбүлүкэ араас муннугуттан төрүт олохтоох аҕыйах ахсааннаах хотугу норуоттар айар кэлэктииптэрэ, ырыа ааптардара, толорооччулар көхтөөхтүк кыттыбыттар. Хас биирдиилэрэ бэйэлэрин норуоттарын уратытын, фольклорун бар дьоҥҥо өрүү буоларыныы олус кыһаллан, ис сүрэхтэриттэн иэйэн көрдөрбүттэр. Бу долгутуулаах киэһээ дүҥүр, хомус тыаһын сэргэ чыычаах чыбыгырыыра, айылҕа суугунуура, тэтимнээх ырыаны кытта намыын ырыалар дьиэрэйбиттэр.
— Хас биирдии ньүөмэри Абый оройуонун бочуоттаах гражданина, СӨ култууратын үтүөлээх үлэһитэ Владимир Индигирскэй бэрэссэдээтэллээх дьүүллүүр сүбэ болҕойон көрдө-иһиттэ, сыаналаата. Дьүүллүүр сүбэҕэ СӨ Олоҥхо тыйаатырын артыыһа, норуот ырыаһыта, олоҥхоһут, СӨ үтүөлээх артыыһа, эбэҥки култууратын илдьэ сылдьааччы, тарҕатааччы Валентин Исаков, национальнай култууралар кииннэрин салайар, «Дыхание земли родной» телебырайыак ааптара уонна ыытааччыта, РФ суруналыыстарын сойууһун чилиэнэ, эбээн култууратын илдьэ сылдьааччы, тарҕатааччы Анна Кай – Анна Рябова, А.Е.Кулаковскай аатынан норуоттар доҕордоһууларын дьиэтин генеральнай дириэктэрин бастакы солбуйааччы, СӨ култууратын үтүөлээх үлэһитэ Розалия Колосова, Аллайыаха оройуонун «Инди» этнокултуура киинин салайааччы, СӨ култууратын үтүөлээх үлэһитэ, эбээн култууратын илдьэ сылдьааччы, тарҕатааччы Максим Дуткин үлэлээтилэр.
Бэстибээл-куонкурус түмүгүн таһаарыы, кыайыылаахтары эҕэрдэлээһин ытыс тыаһынан арыалланна, хас биирдиилэригэр истиҥ баҕа санаалар этилиннилэр.
«Надежда Севера» анал аат Дьокуускай куорат, «Катюша» оҕо саадын «Айынчаан» ансаамбылыгар туттарылынна. «Наследники традиций» анал аат быйылгы хаһаайынынан Муома оройуонун Улахан Чыыстайыттан кэлбит Любомир Попов буолла. «Горловое пение» номинацияны Аллараа Халыма Колымскай сэлиэнньэтиттэн кыттыбыт Екатерина Сыроватская уонна Виктор Тынаургин ыллылар. «Лучший исполнитель родового пения» диэн анал аакка быйыл Кэбээйи улууһун Сэбээн Күөлүн олохтооҕо Зоя Степанова тигистэ. Эбээн ырыатын толорооччу, ааптар Андрей Громов – Агди аатынан анал бириэмийэ Муома Улахан Чыыстайын «Эгдэм мола» дьиэ кэргэн ансаамбылыгар бэрилиннэ. Төрүт олохтоох аҕыйах ахсааннаах хотугу норуоттар ырыаларын толорооччу, эбэҥки норуотун ырыаларын ааптара, мелодист, СӨ култууратын үтүөлээх үлэһитэ Надежда Докалова аатынан бириэмийэни быйыл Тээнэ (Өлүөхүмэ) ырыаһыта Ляна Яковлева тутан үөрдэ. «Аллараа Халыматааҕы «Ярар» фольклор ансаамбылын бастакы салайааччыта, чукотка фольклорун илдьэ сылдьар Анна Дмитриевна Неустроева номинациятыгар Дьокуускайга олорор Люкуодэ Ситдикова-Тымкыль тигистэ. Поэт, драматург Геннадий Алексеевич Дьячков аатынан анал бириэмийэ дьүкээгир ырыатын толорооччулартан Ирина Дускуловаҕа (Үөһээ Халыма, Нелемнай, «Русское устьей ансаамбылы төрүттээбит Вениамин Гаврилович Чикачев номинацията фольклор ырыаларын толорооччулартан Татьяна Шкулеваҕа (Аллайыаха, Русскай Устье, СӨ култууратын туйгуна, долган ырыаларын толорооччу Спиридон Иванович Туприн номинацията Константин Спиридоновка (Анаабыр, Үрүҥ Хайа) ананнылар. «Приз зрительских симпатий» — Оскар Соловьев-Худи (Муома, Улахан Чыыстай) буолла. Оттон «Эхо тундры и тайги» бэстибээл-куонкурус сүрүн бирииһэ — Гран-при үрдүк аата Өлөөнтөн кэлбит «Сигун» диэн эбэҥки этнобөлөҕөр дохсун ытыс тыаһыгар доҕуһуоллатан туттарылынна.
Хас биирдии норуот өбүгэтин үгэһин, тылын-өһүн, сиэрин-туомун харыстыыр, кэнчээри ыччакка тиэрдэргэ кыһаллар. Маннык ньыманан үлэлээһин уруккуну, билиҥҥини уонна кэлэри ситимниир далаһанан буолар. Онон бу бэстибээл сыллата тиһиктээхтик тэриллэн ыытылларыгар, далааһыннанан иһэригэр баҕараллар.
Бэстибээл-куонкурус СӨ төрүт олохтоох норуоттарын Норуоттар икки ардыларынааҕы сылларын уонна СӨ төрүт олохтоох аҕыйах ахсааннаах хотугу норуоттар Ассоциациялара тэриллибитэ 30 сылын чэрчитинэн ыытылынна.
Сүрүн тэрийээччилэр — СӨ Тас сибээскэ уонна норуоттар дьыалаларыгар министиэристибэ, СӨ төрүт олохтоох аҕыйах ахсааннаах хотугу норуоттар Ассоциациялара, Дьокуускай куорат култуураҕа управлениета, А.Е. Кулаковскай аатынан норуоттар доҕордоһууларын дьиэтэ.
Хаартыскаларга Айталина АРГУНОВА түһэриитэ.