Тутууга олохтоохтору эбии үөрэтэргэ 75 мөлүйүөнү көрүөхтэрэ

Өрөспүүбүлүкэҕэ тутууга олохтоох каадырдар үлэлиэхтэрэ. Үлэтэ суох дьону анаан үөрэтэн, квалификацияларын үрдэтэн, тутууга оробуочай каадырдары бэлэмниэхпит. 1500-тэн аҕыйаҕа суох киһини үөрэттэрэргэ эбии 75 мөлүйүөн солкуобайы көрүөхтэрэ. Бу туһунан бырабыыталыстыба бэрэссэдээтэлэ Андрей Тарасенко иһитиннэрдэ.

— Сааҥсыйалар кэмнэригэр экэниэмикэ сайдыытын хамсатар күүһүнэн тутуу буолар. Атын  салаалары эмиэ хамсатар. Билиҥҥи усулуобуйаҕа тутуу салаатыгар олохтоох үлэһиттэри күүскэ тардыахха наада, — диэн Ил Дархан Айсен Николаев бу иннинэ этэн турар.

Билигин тутууга үлэлиир оробуочайдар аҥаардара – олохтоох дьон. Ону тэҥэ, бу эйгэҕэ сайыҥҥы кэмҥэ үлэһиккэ наадыйыы эмиэ син-биир баар буолар, ону эрдэттэн билгэлиэххэ наада.

— Пандемия саҕаланан, кыраныыссалар сабыллыбыттарыгар, омук оробуочайдарын олохтоох үлэһиттэринэн солбуйбуппут. Устудьуоннар тутар этэрээттэрин үлэлэппиппит, үлэтэ суох дьону үөрэттэрбиппит. Онон үтүө түмүктээх уопут баар. Бу үлэни салгыахха наада, — диэн Андрей Тарасенко эттэ.

Премьер нэдиэлэ иһигэр тутуу министиэристибэтигэр тутуу хампаанньаларыгар төһө үлэһит наадатын быһаара охсорго соруйда.

Ангелина Васильева, “Саха сирэ” хаһыат, edersaas.ru

Хаартыска: sakhagov.r

u