Тутааччылар нэһилиэнньэттэн өлүүлэһэн тутууга харчы хомуйан баран, эбийиэктэрин араас биричиинэнэн кыайан ситэри туппакка, эбэтэр сатаан докумуоннаппакка быраҕан кэбиһэллэр. Ол төрүөтэ биллэр: үп-харчы тиийбэт. Маннык түгэҥҥэ харчыларыттан маппыт уонна дьиэлэрин күлүүһүн туппатах, көҥдөйгө ипотека төлүү олорор дьон көмө көрдөөн, судаарыстыба уорганнарыгар тиийэллэр.
edersaas.ru
Дьиҥэр, судаарыстыба ол дьон иннигэр туох да эбээһинэһэ суох эрээри, араас үүтү-хайаҕаһы көрдөөн, бүтэһик албыннаппыт киһиэхэ диэри баар кыһалҕаны быһаарыахпыт диэн эттэ СӨ бырабыыталыстыбатын бэрэссэдээтэлин солбуйааччы Кирилл Бычков.
Суобаһа суох тутааччылартан эмсэҕэлээбит дьону кытта көрсүһүүгэ сэтинньи 20 күнүгэр бу хайысханан нэһилиэнньэни көмүскүүргэ туох үлэ бара турарын иһитиннэрдилэр.
Күн бүгүн бүддьүөт суотугар уонна тастан көмө быһыытынан, кыһалҕаҕа ыктарбыт эбийиэктэр 75% быһаарылынна. Билиҥҥитэ өлүүлэһэн тутууга 146 албыннаппыт дьон, 96 икки хос атыылааһынтан эмсэҕэлээбиттэр балаһыанньалара быһаарыллыан наада. Аны 366 кыбартыыра кэмигэр тутуллан бүтэрэ тардыллан, эмиэ куттал үөскээбит.
СӨ Тутууга министиэристибэтэ ити кыһалҕаны быһаарарга араас ньымалары көрөр. Онтон биирдэстэрэ, тохтоон турар тутууга саҥа бэдэрээтчити булан, киниэхэ тутууну бүтэттэрэн, ол үлэтин саҥа учаастагы биэриинэн төлөһүөххэ сөбүн этэр.
Өлүүлэһэн тутууга албыннаппыт дьон интэриэһин көмүскүүргэ быйыл саҥа тэриллибит «Квадрат» общественнай тэрилтэ үлэлэһэн эрэр. Манна “Теплосервис”, “Стерх”, “Бииргэ тутабыт” ХЭТ уонна Ильинка оройуоҥҥа үс дьиэни тутуохтаах Черов тэрилтэтиттэн эмсэҕэлээбиттэр мустан, көҕүлүүр бөлөхтөрө киирэр.
«Бу кыһалҕаны быһаарарга уопсай сорук оҥостон, муниципальнай тэриллии баһылыктарын эмиэ киллэриэххэ наада. Хас биирдии тутуллубакка турар эбийиэккэ дорожнай каарта оҥорон, инвестордары ыҥыран, тутуу бүтэрин, дьон дьиэлэнэрин ситиһиэхтээхпит», — диэн түмүктээтэ Кирилл Бычков.
Марианна Тыртыкова, «Саха сирэ», edersaas.ru