Доруобуйа харыстабылын тутууларыгар үлэ хайдах салҕанан иһэрин хамыыһыйа көрдө.
Хамыыһыйа чилиэттэрэ кардиология уонна искэн ыарыылаахтары эмтиир диспансердар тутууларын хаамыытын билистилэр, Дьокуускайдааҕы стоматологическай киини саҥардан оҥорууну көрдүлэр, өрөспүүбүлүкэтээҕи харах балыыһатыгар сырыттылар.
Оробуочай бөлөххө СӨ Бырабыыталыстыбатын бэрэссэдээтэлин бастакы солбуйааччы Кирилл Бычков, СӨ Бырабыыталыстыбатын бэрэссэдээтэлин солбуйааччы Ольга Балабкина, СӨ Доруобуйа харыстабылын миниистирэ Елена Борисова, СӨ Тутуу миниистирэ Павел Кылатчанов, СӨ судаарыстыбаннай мунньаҕын (Ил Түмэн) бэрэссэдээтэлэ Алексей Еремеев уо.д.а. бааллар.
Дэлэгээссийэ Дьокуускайга өрөспүүбүлүкэтээҕи кардиологическай диспансер тутуллуутун көрдө (150 миэстэҕэ сүрэх-тымыр ыарыылаахтары эмтиир киин — иккис уочаратын). Билиҥҥи туругунан эбийиэк 65% бэлэм. Кардиодиспансеры быйыл ахсынньыга бүтэрэллэрэ күүтүллэр. Тутуу 2019 сылтан саҕаламмыта. Генеральнай бэдэрээччит «Сэттэ» ТХ. Салгыы искэн арыыны эмтиир өрөспүүбүлүкэтээҕи диспансеры көрдүлэр (симиэнэҕэ 210 киһи сылдьар искэн ыарыылаахтары эмтиир поликлиникалаах киин, 180 куойкаҕа стационардаах уонна хаһаайыстыбаннай блоктаах).
СӨ бастакы вице-премьерэ Кирилл Бычков бэлиэтээбитинэн, эбийиэк болдьоҕун балачча иннинэ бүтүөн сөп — 2022 сылга эбэтэр 2023 сыл саҥатыгар. Маны таһынан, оробуочай бөлөх саҥалыы уларытыллан оҥоһуллар «Дьокуускайдааҕы анал стоматологическай киин» ГАУ дьиэтин-уотун көрдө. Урут Свердлов уулуссатыгар турбут онкодиспансер дьиэтэ мэдиссиинэ тэрилтэтигэр сөбө суоҕунан билиниллибитэ. Өрөмүөн бүттэҕинэ, онно оҕо уонна улахан дьон стоматологията үлэтин саҕалыахтаах. Дэлэгээссийэ өрөспүүбүлүкэтээҕи харах килиниичэскэй балыыһатыгар эмиэ сырытта.
Тутууларга сылдьан баран, Алексей Еремеев доруобуйа харыстабылыгар туһуламмыт тутуулар хаамыыларын уу хараҕынан көрүү сүрүн сыалынан буолбутун эттэ. «Оҥоһуллубут уонна ыытылла турар үлэлэри сүрүннээн сөптөөҕүнэн сыаналаатыбыт. «Доруобуйа» национальнай бырайыак чэрчитинэн өрөспүүбүлүкэ бүддьүөтүттэн көрүллэр үп өрөспүүбүлүкэҕэ көдьүүстээхтик туһанылларын бэлиэтээтибит», — диэтэ кини.
+1
+1
+1
+1
+1
+1
+1