Өрөспүүбүлүкэҕэ аһы-үөлү аҕалыы боппуруоһа бырабыыталыстыба бэбиэскэтигэр күннэтэ турар. Саахар, бурдук суох буолла диэн олохтоохтор аймаммыттара ыраатта. СӨ Бырабыыталыстыбатын бэрэссэдээтэлин солбуйааччы Михаил Никифоров бородууктанан хааччыллыыга брифинг кэмигэр бүгүн иһитиннэрбитинэн, «Арассыыйа тимир суоллара» АУо бородуукта, табаар тиэниилээх 1545 богуону аҕалан иһэриттэн 865-һэ Аллараа Бэстээххэ кэлэн сүөкэниллиэҕэ.
Билиҥҥи туругунан, ньиэп уонна ас-үөл бородуукталаах, хаһаайыстыбаҕа туһаныллар табаардаах 321 богуон Аллараа Бэстээххэ кэлбит. Түгэнинэн туһанан, Аллараа Бэстээххэ кууһунан атыылыыр маҕаһыын дириэктэрэ Мансур Мубаракшинтан ыйыталаспыппар: “Атыыга бурдук баар. Соторутааҕыта 66 туонна бурдук кэлбититтэн аҥаара барда, киилэтин 41 солк. 30 харчыга атыылыыбыт. Саахар билигин атыыга суох. Сакаастаабыт саахарбын кулун тутар 30 күнүгэр тимир суолунан ыыппыттара, онон 15-20 күнүнэн Аллараа Бэстээххэ кэлиэҕэ”, — диэн хоруйдаата.
Бу күннэргэ Дьокуускайга 63 саҥа оптуобус аҕалылынна. Чугастааҕы кэмҥэ эбии 37 техника кэлиэхтээх. Тырааныспар миниистирэ Владимир Сивцев иһитиннэрбитинэн, саҥа оптуобустарынан хааччыллыы РФ Минпромторгун бырагырааматыгар кыттыы көмөтүнэн ыытылынна. Ил Дархан Айсен Николаев 2021 сыллааҕы Илиҥҥи экэнэмиическэй пуорумҥа бу туһунан миниистир Денис Мантуровы кытары өрөспүүбүлүкэ киин куоратын оптуобуһун паарҕкатын саҥардыы туһунан кэпсэппитэ. Дьокуускай олохтооҕо Ирина Кривошапкина куорат дьаһалтата уонна өрөспүүбүлүкэ салалтата куорат автопааркатын саҥардыы туһунан бэйэтин санаатын үллэһиннэ:
— Бу сонуну олус үөрэ иһиттим. Бары көрө-билэ сылдьабыт, куорат оптуобустара олус эргэрдилэр. Билигин дьэ саҥа улахан оптуобустар линияҕа таҕыстахтарына, биһиги, куорат олохтоохторо, дьэ абыраныа этибит, — диэтэ.
Билигин өрөспүүбүлүкэҕэ тутуу, өрөмүөн боппуруоһа сытыытык турар. Бүгүн Ил Дархан Айсен Николаев СӨ Бырабыыталыстыбатын салайааччыларын кытта РФ Бырабыыталыстыбата Саха сиригэр сүрүн тэрилтэлэри, национальнай бырайыактары өйүүргэ уонна туризмы сайыннарыыга аналлаах миэрэлэри олоххо киллэрии хайдах-туох бара турарын туһунан мунньахтаата. Биир сүрүн бырайыагынан Саха сиригэр оскуолалар үөрэтэр систиэмэлэрин саҥардыы буолар. Манна чуолаан хапытаалынай өрөмүөн эмиэ киирэр. 2022-2023 сс бырайыагы олоххо киллэриигэ 2 млрд 889 мөл. солк. көрүллүбүт. Ити кэрдиис кэмҥэ 25 улууска барыта 58 үөрэх тэрилтэтигэр өрөмүөн ыытыллыахтаах.
Эмиэ бу күн Ил Дархан Айсен Николаев «Саха» НКИХ ханаалынан “Якутия, вперед” анал биэриитигэр ааспыт ыйга өрөспүүбүлүкэ үрдүнэн туох үлэ ыытыллыбытын туһунан иһитиннэрдэ. Арассыыйа уонна Украина сыһыаннаһыыларыттан арҕаа дойдулар араас хабааннаах экэнэмиичэскэй сааҥсыйалара Саха сирин экэниэмикэтигэр дьайыыны оҥорбута чуолкай. Холобур, бородуукта, табаар сыаналара үрдээбитэ. СӨ Бырабыыталыстыбата чуолаан ханнык миэрэлэри ылбытын туһунан Айсен Николаев саас-сааһынан быһааран биэрдэ.
—Арҕаа дойдулар Арассыыйаны утары сааҥсыйалара бородууксуйаны тиэрдии логистикатыгар мэһэйи үөскэттэ. Балары туоратыыга сөптөөх дьаһаллар ылылла тураллар. Итинтэн сылтаан бородуукта сыаната биллэрдик үрдээтэ. Биһиги сөптөөх миэрэни тута ылыммыппыт. Бастакы уочаратынан сыана аһара үрдээбэтин ситиһэр инниттэн атыынан-кутуунан дьарыктанар урбаанньыттарга, кууһунан атыылааччыларга чэпчэтиилээх кирэдьиити көрбүппүт. Билигин ити миэрэ көдьүүстээҕин көрдөрөн эрэр. Кууһунан атыылыыр тэрилтэлэр туруоруллубут сыалы-соругу ситистилэр. Ол курдук, үс ыйга тиийэр биирдиилээн атыылыырга аналлаах бородуукта саппааһа мунньулунна. Ону тэҥэ, түөрт ыйга кууһунан атыылыырга тиийэр бородуукта саппааһа баар буолла. Итиннэ эбии тустаах таһаҕас атыыга кэлэ турар. Бу күннэргэ Аллараа Бэстээххэ 1400 богуоҥҥа бородуукта, табаар кэлэрэ күүтүллэр. Күн аайы 150-170 богуон сүөкэниллэр. Тустаах үлэ тохтоло суох барар, — диэн бэлиэтээн эттэ.
edersaas.ru