СӨ тутууга миниистирэ Павел Кылатчанов Инстаграмынан быһа сибээскэ тахсан, нэһилиэнньэ ыйытыытыгар хоруйдаата.
“Былырыын 516 тыһыынча кв. миэтэрэттэн итэҕэһэ суох олорор дьиэни үлэҕэ киллэрэр соругу туруорбуттара. 527 тыһыынча кв. миэтэрэ иэннээх дьиэ тутулунна”, – диэн миниистир иһитиннэрдэ.
Хамсык дьаҥа бытаарыыны таһаардар да, былаан туолбут. Ол курдук, былырыын саахалланар туруктаах дьиэттэн дьону көһөрүү бырагырааматын олоххо киллэрбиттэр. Миниистир ити быйыл эмиэ салҕанан барарын эттэ. “109 тыһыынча кв. миэтэрэ иэннээх диэн быспыттара эрээри, биһиги былааны 8 тыһыынча кв. миэтэрэнэн аһардыбыт. Онон 6300-тэн тахса киһини саахалланар туруктаах дьиэттэн көһөрдүбүт” – диэн эттэ.
Онтон эбийиэги тутууга үөрэх тэрилтэлэрэ былаан быһыытынан үлэҕэ киирбиттэр. Ол курдук, Сунтаар, Ньурба улуустарыгар уһуйааннары тутуу, Дьокуускай куорат Прометей түөлбэтигэр 119 миэстэлээх уһуйааны, Аллараа Бэстээххэ (Мэҥэ Хаҥалас улууһа) бассейннаах уонна Бэрдьигэстээххэ (Горнай улууһа) спорт саалаларын, о.д.а. тутуулары үлэҕэ киллэрбиттэр.
Ону тэҥэ, Дьокуускай куорат 203-с түөлбэтигэр 360 миэстэлээх оскуола тутуллубута, бүгүн 315 оҕо үөрэнэр 31-с нүөмэрдээх оскуола салҕааһына үөрүүлээх быһыыга-майгыга аһылынна.
Миниистир, быйыл социальнай эбийиэги тутуу былаана намтаабытын ыйар. Улуустарга, Дьокуускай куоракка тутуу салгыы барарын, сорох улуустарга дьиэ атыылаһыахтаахтарын иһитиннэрэр.
Быйыл Бүлүү улууһугар ньиэрбэ ыарыһахтары эмтиир 150 миэстэлээх интэринээт-дьиэ үлэҕэ киириэхтээҕин, Өлүөхүмэ куоракка кырдьаҕастарга уонна инбэлииттэргэ аналлаах 200 миэстэлээх куорпус тутуута салҕанарын эттэ.
Онтон саахалланар туруктаах дьиэттэн дьону көһөрүү соруга икки бүк эбиллибитин ыйар. Ол курдук, сыл устата 12 тыһыынча кэриҥэ киһи көһүөхтээх эбит.
Людмила ПОПОВА, “Саха сирэ” хаһыат, edersaas.ru