Тутааччылары саҥа сокуон ыарыылаахтык охсубатын туһугар көмө оҥоһуллуо
Өлүүлэһэн тутууга от ыйын 1 күнүттэн сокуон уларыйарынан сибээстээн, тутуу хампаанньалара нэһилиэнньэттэн хомуйбут харчыларын бааҥҥа тыытыллыбат эскроу-счекка уган кэбиһиэхтэрэ. Ол үптэрин дьиэлэрин тутан бүтэрдэхтэринэ биирдэ устар кыахтаныахтара. Онон тутааччылар бэйэлэрин үптэригэр уонна баантан кирэдьиит ылан дьиэ тутуохтара. Өскөтүн эбийиэги тутан бүтэрбэтэхтэринэ, өлүүлэһэн тутууга киирбит дьон харчыларын эскроу-счеттан төннөрүөхтэрэ.
edersaas.ru
Маннык миэрэни судаарыстыба өлүүлэһэн тутууга киирэн баран албыннаппыт, харчытын уган баран дьиэтин күлүүһүн ылбатах дьону көмүскүүр сыалтан олоххо киллэриэҕэ. Тутааччылары маннык саҥа сүүрээн ыарыылаахтык охсуон сөп. «Ол эрэн, дьиэ тутуута аҕыйаабатын, үлэ тохтооботун туһугар тутуу ырыынагын кыттааччыларын өйүөхпүт, үбүлээһин кэмигэр оҥоһулларыгар, кирэдьиит ылалларыгар, мэктиэ булалларыгар көмөлөһүөхпүт», — диэн иһитиннэрдэ бэҕэһээ олунньу 28 күнүгэр өрөспүүбүлүкэ вице-премьерэ Кирилл Бычков.
Ил Дархан Айсен Николаев 2024 сылга диэри элбэх кыбартыыралаах дьиэ тутуутун икки төгүл элбэтэргэ, 960 тыһыынча кв.м. тириэрдэргэ сорук туруорбутун санатта кини.
Сокуон быһыытынан, өлүүлэһэн тутууга эрдэ хомуллубут харчы көмөтүнэн тутааччы дьиэни тутан бүтэриэхтээх. РФ Тутуутун министиэристибэтэ тутуу кэмигэр бүтэрин икки хайысханан сыаналыахха сөбүн этэр. Өскөтүн өлүүлэһэн тутууга оҥоһуллубут дуогабар 10%, онтон эбийиэк 30% бэлэм түгэнигэр дьиэ кэмигэр тутуллан бүтэрин күүтүөххэ сөп.
«Ылсыбыт дьиэлэрин сатаан бүтэрбэт кутталга киирбит хампаанньалары кытта биирдиилээн үлэлэһиэхпит, эбийиэк тутуллан бүтэрин уонна дьон албыҥҥа киирэн биэрбэтин ситиһиэхпит», — диэтэ Бырабыыталыстыба бэрэссэдээтэлин солбуйааччы Кирилл Бычков. Кини туруорсуутунан, суобаһа суох тутааччылартан эмсэҕэлээбит дьоҥҥо бүддьүөттэн оҥоһуллар көмө харчы уопсай суумата 20 мөлүйүөнтэн 150 мөлүйүөҥҥэ диэри улаатта, диэн иһитиннэрэр Ил Дархан уонна бырабыыталыстыба пресс-сулууспата.
Марианна Тыртыкова, «Саха сирэ» хаһыат, edersaas.ru