Бүгүн, муус устар 19 күнүгэр, Дьокуускайга М.К. Аммосов аатынан Хотугулуу-Илиҥҥи федеральнай университет тиэхиньичэскэй факультеттарын куорпуһугар Саха сирин тутуутун салайар дьон устудьуоннары кытта көрүстэ.
Манна Саха сирин эдэр тутааччыларын ассоциациятын бэрэсидьиэнэ Василий Данилов, өрөспүүбүлүкэ сүрүн архитектора Ирина Алексеева, «Адгезия» хамнаанньа генеральнай дириэктэрэ Михаил Охлопков, инженерно-тиэхиньическэй институт дириэктэрэ Терентий Корнилов уо.д.а. кыттыыны ыллылар. Көрсүһүү сүрүн соругунан эдэр тутааччылары сомоҕолооһун, кинилэр научнай уонна айар инникилэрин сөпкө туһаналларын ыйан-кэрдэн биэрии буолла.
«Сахабыт сирэ олус тэтимнээхтик сайдар. Уһук Илиҥҥэ, чуолаан Саха сиригэр, федеральнай бүддьүөттэн тутуу эйгэтигэр элбэх үп-харчы көрүллэн эрэр. Манан сибээстээн улахан тутуулар барыахтара. Биһиги тутуу эдэр көлүөнэтин исписэлиистэрэ — инженердэр, архитектордар барытыгар бэлэм буолуохтаахпыт. Бу тутууларынан сайдыыбыт тохтуо суоҕа, өссө баараҕай тутуулар саҕаланыахтара буоллаҕа. Манна Саха сирин эдэр каадырдара, номнуо идэтийбит, үлэлэрин баһылаабыт дьон үлэлиэхтээхтэр дии саныыбын. Көрсүһүүгэ устудьоуннарга билиҥҥи тутууга туох ирдэнэрин, ханнык идэлэр наадаларын быһааран биэрдибит«, — диэн Саха сирин эдэр тутааччыларын ассоциациятын бэрэсидьиэнэ Василий Данилов санаатын үллэстэр.
Маны сэргэ, мустубут ыччакка Саха сирин сүрүн архитектора Ирина Алексеева өрөспүүбүлүкэ иһигэр тутуу уратытын, инникитин, туох кыһалҕалар баалларын кэпсээтэ, ырытта. Кини бүгүҥҥү күҥҥэ ордук инженер, архитектор уонна ОДьКХ биир тэҥҥэ үлэлээтэҕинэ эрэ куорат тупсаҕай көстүүлэнэр, устудьуон үөрэх кыһатыгар көннөрү лиэксийэни истэн эрэ буолбакка, бэйэтин баҕатынан сайдыахтаах, эбии дьарыктаныахтаах, араас бырайыактага үлэлэһиэхтээх диэн этэр.
Айтана Аммосова, edersaas.ru
Светлана Павлова хаартыскаҕа түһэриилэрэ.