«РОССТРОЙ” ХЭТ ууну киртиппитин уонна сир учаастагын бөҕүнэн толорбутун иһин эппиэтинэскэ тардылынна. Административнай хамыыһыйа быһаарыытынан тэрилтэ 250 тыһыынча солкуобайынан ыстарааптанна.
edersaas.ru
“Oneclick Yakutia портал нөҥүө гражданнар Дьокуускай куораты тупсаҕай оҥоруу быраабылата кэһиллибитин эппиттэр. Атырдьах ыйын 20 күнүгэр Административнай хамыыһыйа исписэлииһэ бу миэстэҕэ тиийэн, бөҕү сөбө суох сиргэ тохпуттарын көрбүтэ. Бу чахчыга олоҕуран, атырдьах ыйын 25 күнүгэр “РОССТРОЙ” ХЭТ генеральнай дириэктэрэ Книязян Роберт Фрунзевичка кэһиини таһаарбытын иһин СӨ КОАП 6.25 ыст. 1 ч. боротокуол толоруллубута. Онтон Алминистративнай хамыыһыйа мунньаҕар көрүллэн, юридическай сирэйгэ 250 тыһыынча солкуобай ыстараап олохтоммута”, — диэтэ бу хамыыһыйа чилиэнэ Дьулустан Тоскин.
Өрөспүүбүлүкэ айылҕа харыстабылын борокуратууратынан эппиэккэ тардыллыаҕа. Ону тэҥэ уу эбийиэктээх сир учаастагын көҥүлэ суох биэрии чахчытын быһаарсыахтара.
От ыйыгар Геологтар бөһүөлэктэрин олохтоохторо Yakutia.click порталга Билибин уулуссатынан баар күөлү кутуу ыытылларын туһунан эппиттэрэ.
Бу портал үлэһиттэрэ Экология министиэристибэтигэр уонна айылҕа харыстабылын борокуратууратыгар бу чахчынан бэрэбиэркэ ыыталларыгар сайабылыанньа түһэрбиттэрэ.
“Геологтар бөһүөлэктэрин олохтоохторугар көхтөөх гражданскай быһыыларын иһин махтанабыт. Олохтоохтор көмөлөрүнэн тутааччы ыстарааптанна уонна борокуратуура быһаарыытынан күөлү чөлүгэр түһэриэҕэ”, — диэтэ OneclickYakutia сонуннары тарҕатар сириэстибэлэри кытта үлэҕэ отделын начаалынньыга Сусанна Рожина.
Бэлэмнээтэ Женни Стрюкова, edersaas.ru
Хаартыска: интэриниэттэн