Бу күннэргэ Саха сирин тустууга хамаандата Тахсар күннээх дойдуга үөрэтэр-эрчиллэр түмсүүгэ сылдьарын туһунан сырдатан турабын. Хамаанданы СӨ Үрдүкү спортивнай маастарыстыбаҕа оскуолатын дириэктэрин бастакы солбуйааччы Леонид Спиридонов салайан илдьэ сылдьар. Манна сыһыары тутан эттэххэ, 2000 сыллаахха Леонид, Япония киин куоратыгар ыытыллыбыт устудьуоннар аан дойдутааҕы чөмпүйэнээттэригэр бастакы миэстэни ылан турар. Онон Токиоҕа кини бастакы сырыыта буолбатах диэххэ сөп.
Онтон атыттар, СӨ көҥүл тустууга сүүмэрдэммит хамаандатын сүрүн тренерэ Владимир Кириллин, өрөспүүбүлүкэ үтүөлээх тренерэ Иван Дмитриев, тустууктар Арыйан Тютрин, Николай Охлопков, Вячеслав Ефремов, Ньургун Скрябин, Егор Пономарев, Виктор Рассадин, Виктор Степанов, Герман Устинов, Тимур Николаев – Японияҕа бастакы сырыылара. Өссө хамаанданы кытта тылбаасчыт быһыытынан Үрдүкү спортивнай маастарыстыба оскуолатын отделын начаалынньыгынан үлэлиир Екатерина Аммосова сылдьыһар.
Кинилэр манна ыам ыйын 3 күнүгэр диэри Япония сүүмэрдэммит хамаандатын кытта бииргэ эрчиллиэхтэрэ. Биллэрин курдук, биһиги бөҕөстөрбүт сүрүн сыаллара-соруктара бэс ыйын ортото Ингушетияҕа ыытыллар Россия чөмпүйэнээтэ буолар. Онно бэлэмнэнии чэрчитинэн, бу, Японияҕа сырыы тэрилиннэ диэн өйдүөхххэ сөп. Оттон дьоппуоннар сотору кэминэн Индияҕа буолар Азия чөмпүйэнээтигэр уонна АХШ-ка тэриллэр табаарыстыы көрсүһүүгэ бэлэмнэнэллэр. Онон бу көрсүһүү икки өттүттэн төһө туһалаах буолбутун, ити күрэхтэһиилэргэ сахалар уонна дьоппуоннар хайдах кытталларыттан сыаналыахпыт.
Бэҕэһээ, ол аата, муус устар 27 күнүгэр Токиоҕа, Тустуу киинигэр Саха сирэ уонна Япония хамаандаларын табаарыстыы көрсүһүүлэрэ тэрилиннэ. Япония спортивнай тустууга федерациятын анал сайтын кылаабынай редактора Икуо Хигучи суруйбутунан, тустуу эрчиллиигэ тэҥнээн, биһиэхэ этэллэринии, “пуш-пуш” курдук, ол аата, наһаа хабырдык буолбакка тэриллибит.
Ол көрсүһүүнү туоһулуур хаартыскалары бэҕэһээ киэһэ Икуо Хигучиттан туппуппун, ааҕааччыларга билиһиннэрэбин.
Петр ПАВЛОВ, “Саха сирэ”, www.edersaas.ru