Ахсынньы 10-12 күннэригэр Дагестан Хасавюрт куоратыгар XIX-XX үйэлэр аатырбыт тустууктарын кэриэстэригэр ыытыллар норуоттар икки ардыларынааҕы турнир буолуоҕа.
«Өрөгөй» успорка бэлэмнээх буолуу киинин пресс-сулууспата иһитиннэрэринэн, Саха сирин аатыттан турнирга Арассыыйа чөмпүйэнээттэрин призердара Виктор Рассадин уонна Дмитрий Аксенов, Европаҕа бастыыр иһин күрэхтэһии уонна аан дойду кыайыылаахтара ини-бии Алексей, Петр Копыловтар, Польша сүүмэрдэммит хамаандатын састаабыттан континент чөмпүйэнээтин призера Эдуард Григорьев, итиэннэ Тимур Николаев, Ньургун Сергин, Петр Константинов, Максим Толмачев, Константин Власов, Быйан Быйаман уонна Яков Павлов кыттыахтара.
Көҥүл тустууга Саха сирин сүүмэрдэммит хамаандата ахсынньы 21 күнүгэр диэри Кабардино-Балкарияҕа дьарыктанар сборга барыахтара. Бу норуоттар икки ардыларынааҕы уонна Арассыыйатааҕы күрэхтэһиилэргэ бэлэмнэнии иккис түһүмэҕэ буолар. Ол иннинэ спортсменнар сэтинньи 15-27 күннэригэр «Өрөгөй» саалатыгар сүрүн тириэньэр Александр Оконешников салалтатынан дьарыктаммыттара.
Кабардино-Балкарияҕа сбор кэнниттэн, ахсынньы бүтүүтэ, сорох тустууктар Красноярскайга Дмитрия Миндиашвили кэриэһигэр ыытыллар Арассыыйатааҕы турнирга кыттыахтара.
Хаартыска Иван Лыткин-Тиит түһэриитэ.