Тустууктар Лев Павлов уонна Стас Свинобоев Араассыйатааҕы турнир финалыгар күрэхтэһиэхтэрэ
Дагестан өрөспүүбүлүкэтин Каспийск куоратыгар бу күннэргэ 21 саастарыгар диэри уолаттарга көҥүл тустууга Арассыыйаҕа бастыыр иһин күрэхтэһии буола турар. Саха сириттэн 57 киилэҕэ диэри тустар Лев Павлов уонна 70 киилэҕэ диэри тустар Стас Свинобоев финалга таҕыстылар.
Саха сирин быйылгы чөмпүйүөнэ Сунтаартан сылдьар 18 саастаах Лев Павлов финалга тахсыан иннинэ биэстэ туһунна, онтон биир даҕаны техническэй баалы утарсааччыларыгар биэрбэтэ. Ол курдук, бастакы эргииргэ Санкт-Петербургтан Ахмед Хучиевы 1:1 ахсааҥҥа, иккис эргииргэ Московскай уобаластан Шамседин Шабаевы 12:1 ахсааҥҥа кыайда. Финал чиэппэринээҕи тустууга Лев Павлов Краснодар тустуугун Самвел Терзяны 2:0 ахсаанынан, салгыы кабардинец Абдул Калибатовы эмиэ эрэллээхтик баһыйда. Финал аҥаарынааҕы киирсиигэ дагестанец Имран Хувкероовы 4:1 ахсааҥҥа кыайда. Онон Саха сирин тустууга кыһыл көмүс мэтээли Владикавказтан сылдьар Артем Гобаевы кытта былдьаһыаҕа.
Арассыыйаҕа бастыыр иһин күрэхтэһии былырыыҥҥы кыайыылааҕа Станислав Свинобоев Москваттан Глеб Гоначаровы 12:2 ахсааҥҥа, Краснодартан Кирилл Баитовы 10:0 ахсааҥҥа, Кемеровоттан Ростислав Королевы 14:4 ахсааҥҥа, Санкт-Петербургтан Ахмед Жилетежевы 6:3 ахсааҥҥа уонна Осетияттан Заур Зигоевы 10:0 ахсааҥҥа кыайан, финалга Хотугу Осетия-Алания бөҕөһүн Заурбек Бугуловы кытта киирсэр чиэстэннэ.
Эдэр тустууктарбытыгар эрэнэрин туһунан Ил Дархан Айсен Николаев «Телеграмыгар» суруйда: «Тустууктарбыт Лев Павлов уонна Стас Свинобоев РФ Дьоруойуон Нурмагомед Гаджимагомедов кэриэһигэр ыытыллар Арассыыйаҕа бастыыр иһин күрэхтэһии финалыгар таҕыстылар. Финал сарсын Арассыыйа спортивнай тустууга федерациятын официальнай сервиһигэр быһа көстүөҕэ. Уолаттарга ситиһиилэри баҕарабыт! Саха сирэ эһигини кытта!»