Бэҕэһээ, муус устар 17 күнүгэр, Благовещенскай куоракка «Вызов Амура ХIХ» панкратион турнирыгар Саха сириттэн, Амма Сатаҕайыттан төрүттээх Роберт Окороков кытынна.
Роберт Окороков көҥүл тустууга Арассыыйаҕа успуорт маастара, норуоттар икки ардыларынааҕы уонна бүтүн Арассыыйатааҕы турнирдар призердара. ММА (булкаастаах охсуһуу искусствотыгар) муҥутуур көрдөрүүтэ — биир охсуһуу, биир кыайыы. Кини утарсааччыта Благовещенскай куораттан булкаастаах охсуһууга Уһук Илин чөмпүйүөнэ Владимир Меджидов, муҥутуур көрдөрүүтэ — биир охсуһуу, биир кыайыы. Аренаҕа күөн көрсүһүү биһиги уолбут туһатыгар түмүктэннэ. Кыайыылаах байыас Роберт Окороков киирсии кэнниттэн Инстаграм ситимин нөҥүө өйөөбүт доҕотторугар, биир дойдулаахтарыгар, SAKHA WRESTLING MMA — дьарыктанар кулуубугар, тириэньэригэр Иван Охлопковка, дьарыктанарыгар көмөлөспүт Игнатий Андросовка махталын тириэртэ. Кыайылаахха бэриллэр кур иһин күөн көрсүһүүнү көрдөөбүтүн туһунан суруйбут. «… Хайдах буолара көстөн иһиэҕэ» диэбит Роберт Окороков.
Хаартыска Инстаграм ситимиттэн SAKHA WRESTLING MMA стр.ылылынна.