Бүгүн, алтынньы 22 күнүгэр, Уус Алдан киинигэр Бороҕоҥҥо ый саҕаланыыта Норвегияҕа ыытыллыбыт көҥүл тустууга аан дойду чөмпүйэнээтигэр боруонса мэтээли ылары ситиспит Арыйаан Тютрины үөрүүлээх быһыыга-майгыга чиэстээтилэр. Бу туһунан Уус Алдан улууһун дьаһалтатын пресс-сулууспата иһитиннэрэр.
«Арыйаан кыайыыга сирдиир күүстээх санаа уонна дьулуур үтүө холобура буолар. Эн үүнэр көлүөнэҕэ сирдьит буолаҕын, эн холобургунан ыччаппыт төрөөбүт сирдэрин-уоттарын дьиҥнээх патриота буола улаатыаҕа», — диэн улуус баһылыга Алексей Федотов этэн туран, ситиһиилээх спортсмены 500 тыһыынча солкуобайдаах сэртипикээтинэн наҕараадалаата. Итиэннэ Арыйаан тус тириньэригэр Иван Дмитриевка 100 тыһыынча солкуобайга уонна бастакы тириэньэригэр Семен Петуховка эмиэ 100 тыһыынча солкуобайга сэртипикээттэри туттарда.
Арыйааҥҥа төрөөбүт-үөскээбит Суоттутун нэһилиэгин баһылыга Василий Иванов «Суотту нэһилиэгин бочуоттаах олохтооҕо» ааты-суолу иҥэрдэ. Бу күн Арыйааны эҕэрдэлии аймахтара, биир дойдулаахтара, бас-көс дьон муһуннулар.
«Төрөөбүт улууспар, баһылыкка Алексей Васильевичка миэхэ куруук көмө-тирэх буоларгытыгар махтанабын. Манна мин тустууга бастакы хардыыларбын оҥорбутум, спортсмен быһыытынан улааппытым», — диэн Арыйаан бэлиэтээн эттэ.
Чиэстээһин кэнниттэн Арыйаан Тютрин Мындааба оскуолатыгар сылдьан эдэр спортсменнары кытта көрсөн кэпсэттэ, ыйытыыларыгар хоруйдаата.
Хаартыскалар — пресс-сулууспаттан.