Көҥүл тустууга спорт норуоттар икки ардыларынааҕы кылаастаах маастара, Рио-де-Жанейро куоракка ыытыллыбыт XXXI сайыҥҥы Олимпийскай оонньуу кыттыылааҕа Айаал Лазарев, фитнескэ Уһук Илин Федеральнай уокурук икки төгүллээх чөмпүйүөнэ, Саха сирин муҥутуур кыайыылааҕа Ирина Даниленко уонна Дьокуускай куорат Киин уокуругун баһылыга Михаил Гасанбалаев – ГТО регионнааҕы салаатын кытта бииргэ үлэлэһиигэ сөбүлэһии түһэрсэн, нуорманы туттарыыны көҕүлүүр дьонунан буоллулар.
Биһиэхэ ситиһиилээх буолууга, чөл, чэгиэн-чэбдик олоххо талаһыыга саҥа, аныгы дьоруойдарга наадалар. Ол сиэринэн “Үлэҕэ уонна Көмүскэниигэ бэлэммин” Бүтүн Россиятааҕы физкултуурунай-спортивнай комплекс олох бары эйгэтигэр ситиһиилээх чаҕылхай дьону холобур оҥосторго анаан, ГТО-ну көҕүлээччилэринэн талар.
Икки өттүттэн Сөбүлэһии түһэрсиитигэр Физическэй култуура уонна маассабай спорт управлениетын начаалынньыга, ГТО Саха сиринээҕи салаатын салайааччы Николай Цыпандин, Спорт министиэристибэтин идэлээх сойууһун бэрэссэдээтэлэ Гаврил Сивцев, педагогическай наука доктора Валерий Кочнев, бодибилдиҥҥа аан дойду чөмпүйүөнэ Александр Гренадеров уонна маассабай спорт управлениетын отделын начаалынньыга Александр Брызгалов кыттыыны ыллылар.
Көрсүһүү түмүгүнэн Айаал Лазаревка, Ирина Даниленкоҕа уонна Михаил Гасанбалаевка – ГТО комплексын туттарыыны көҕүлүүр уонна тарҕатар дьон буолбуттарын туоһулуур тус сертификаттар туттарылыннылар.
Петр ПАВЛОВ, «Саха сирэ», edersaas.ru