Бу туһунан бүгүн, ахсынньы 22 күнүгэр, Ил Дархан Айсен Николаев суруналыыстары кытта көрсүһүү кэмигэр иһитиннэрдэ.
— Сыл бүтүүтэ спортсменнарбыт биһигини олус диэн үөртүлэр. Сыл устата тустууктарбыт хомоттулар эрэ, ол эрэн Айаал Лазарев чаҕылхай хапсыыһыларынан барытын боруостаата. Кини Саха сирин успуордун устуоруйатыгар бастакынан аан дойду Куубагар 125 киилэҕэ диэри ыйааһыҥҥа боруонса мэтээли ылары ситистэ. Бу сөҕүмэр ситиһии.
Сардаана Трофимова да, Василий Егоров да уонна Айаал Лазарев да “Сыл бастыҥ спортсмена” ааты сүгүөхтэрин сөп. Ол эрэн, быһаарыыны мин ылбаппын. Тэрийээччилэр ыытар куоластааһыннарынан быһаарыллыаҕа, манна орооһор табыллыбат. Биһиги эһиил Олимпиадаҕа саха спортсменнарын көрүөхпүт диэн баҕа санаалаахпыт уонна кинилэртэн ким эмэ кыайыыны аҕалыаҕа диэн бүк эрэнэбит.
Успуорду салгыы өйүөхпүт. Эһиил Бэрдьигэстээххэ буолар Манчаары Баһылай аатынан XXI Спартакиадаҕа дойду Олимпийскэй кэмитиэтин салайааччыта Станислав Поздняков кэлэргэ сөбүлэҥин биэрбитэ. Маны таһынан, атын да ааттаах-суоллаах ыалдьыттары күүтэбит. Бу барыта Саха сиригэр успуорт сайдыытыгар туһаны эрэ аҕалыаҕа.
Тустуубутун саҥа таһымҥа таһаарарбыт уолдьаста. Саҥа дьылга диэри хайаан даҕаны тустуу федерациятын мунньаҕын ыытыаҕым. Бүгүн аһаҕастык этиэм этэ — тириэньэрдэр үлэлэригэр сүрүн болҕомто ууруллуон наада, күүһүрдүү үлэтэ ирдэнэр. Ааспыт Арассыыйа чөмпүйэнээтэ тустууну сэргээччилэргэ хомолтоттон уратыны тугу да аҕалбатаҕа. Биһиги бөҕөстөрбүт атын дойдулар ааттарыттан ситиһиилэхтик тусталлара үчүгэй, ол эрэн дойду иһигэр эмиэ мэтээллэри аҕалыахтаахтар.
Родион Кривогорницын, «Саха сирэ» хаһыат, edersaas.ru