Балаҕан ыйын 29 – алтынньы 1 күннэригэр Дьокуускайга, “Триумф” спорт киинигэр Саха АССР, РСФСР, ССРС үтүөлээх тириэньэрэ Дмитрий Петрович Коркин кэриэһигэр көҥүл тустууга Х норуоттар икки ардыларынааҕы турнир ыытыллар.
Гран-при серияҕа киирэр быйылгы улахан түһүлгэҕэ 25 судаарыстыба бөҕөстөрө кытталлара күүтүллэр. Бүгүҥҥү күҥҥэ 12 дойду — Болгария, Германия, Грузия, Молдова, Польша, Румыния, Армения, Афганистан, Канада, Монголия, Китай уонна Турция – турнирга кыттарын номнуо бигэргэтэн олорор.
Онус үбүлүөйдээх күрэхтэһии бириискэ пуонда 44 000 АХШ долларыгар тэҥнэһэр.
Ыйааһыннарыгар бастаабыт бөҕөстөр – 2 000 $, иккис буолбуттар – 1 500 $,
үһүс миэстэҕэ тахсыбыттар – 1 000 $ биһириэниэхтэрэ.
Киирии билиэтинэн араас мал-сал (ол иһигэр тайахха лицензиялар, фитнес-саалаҕа босхо сылдьар сертификаттар) оонньонуоҕа. Дьоллоох билиэттээх көрөөччү “Хендай Солярис” массыына хаһаайынынан буолуоҕа. Санатар буоллахха, олорор сириттэн көрөн, билиэт сыаната 500 — 1 500 солкуобайга диэри халбаҥныаҕа.
Роман Попов, “Саха сирэ” хаһыат