Тустууктарбытыгар көмөлөһүөххэ

Ааптар: 
Бөлөххө киир:

Күндү Саха сирин олохтоохторо — бар дьоммут!

Бу сайын бары билэрбит курдук, Япония киин куоратыгар Токиоҕа сайыҥҥы Олимпийскай оонньуулар ыытыллаллар. Түөрт сылга биирдэ буолар улахан түһүлгэҕэ көҥүл тустууга сүүмэрдиир күрэстэр кэлэр ыйтан саҕаланаллар. Түөрт уолбут — түөрт саха бөҕөһө ити сүүмэрдиир күрэхтэһиилэргэ кыттыахтаахтар. Белоруссия аатыттан Владислав Андреев (57 киилэҕэ), Ньургун Скрябин (65 киилэҕэ), Македония аатыттан Владимир Егоров (57 киилэҕэ) уонна Кыргызтаан аатыттан Айаал Лазарев (125 киилэҕэ).

Бастаан кэнтиниэннэринэн сүүмэрдиир күрэстэр ыытыллыахтаахтар. Европа кэнтиниэнин Олимиадаҕа сүүмэрдиир турнира Венгрия киин куоратыгар — Будапешка кулун тутар 19-22 күннэригэр буолуохтаах. Ити турнирга уолаттарбыт Владислав Андреев, Ньургун Скрябин уонна Владимир Егоров кыттаары бэлэмнэнэ сылдьаллар. Оттон Азия кэнтиниэнин сүүмэрдиир турнира кулун тутар 27-29 күннэригэр Кыргызтаан киин куоратыгар — Бишкекка ыытыллыаҕа. Ити түһүлгэҕэ муҥутуур ыарахан ыйааһыҥҥа тустар бөҕөспүт Айаал Лазарев кыттыаҕа.

Уолаттарбыт эппиэттээх, быһаарыылаах түһүлгэлэргэ бэлэмнэнэн, эт-сиин элэйэр дьарык түһүмэҕэр сылдьаллар. Аан дойду ааттаахтарын кытары күөн көрсөр, улахан успуорт күүрээнигэр сылдьар бөҕөс эппиэттээх түһүлгэлэргэ бэлэмнэниитэ итинэн эрэ муҥурдаммат. Итини таһынан элбэх эмп-томп (успуорт фармокологията), битэмиин (витаминизация), үрдүк кылаастаах эмчиттэр, илбийээччилэр көрүүлэрэ-истиилэрэ, иҥэмтэлээх ас-үөл, сылайыыны-элэйиини таһаарарга үчүгэй усулуобуйалаах олорор, сынньанар сир, тириэньэрдэр барар-кэлэр ороскуоттара эрэйиллэр. Бу манна барытыгар элбэх үп-харчы наада.

Саха тустууга Олимпиада бочуоттаах үктэлигэр турбатаҕа, Олимп чыпчаалыгар тахсыбатаҕа быйыл 44-с сылыгар барда. Саха сирин бөҕөһө түөрт сылга биирдэ буолар, Аан дойду болҕомтото хатанар улахан күрэһэр кыайарын-хоторун ыраламмыппыт ыраатта.

Маннык этэн туран, Сахабыт сирин бары олохтоохторугар бу ыҥырыыны таһаардыбыт. Уолаттарбыт норуоппут аатын улахан түһүлгэҕэ өссө төгүл дорҕоонноохтук ааттаталларын, Олимп чыпчаалыгар тахсалларын туһугар бигэ үктэл, күүс-көмө буолуоҕуҥ!

Ол туһугар уолаттарбыт тус счеттарыгар харчыта ыытыаҕыҥ. Ким баҕалаах уонна кыахтаах төһөнү ыытара бэйэтин көҥүлэ. Харчыны счекка ыытыы алын кээмэйэ 100 солкуобай буолара буоллар диэн баҕа санаабытын этэбит.

Ытыктабыллаах биир дойдулаахтарбыт, эһигиттэн көрдөһөбүт — уолаттары улууһунан, аймаҕынан, тус билсиинэн араарбакка, харчы ыытыыта тэҥ өлүүнэн барарын ситиһэ сатыаҕыҥ.
2020 сыл биллэрин курдук, өрөспүүбүлүкэбитигэр Дойдуга бэриниилээх буолуу сылынан биллэриллибитэ. Онон, уолаттарбыт туһугар түмсүүлээхпитин көрдөрүөҕүҥ!

Уолаттар реквизиттэрэ:

Айаал Лазарев — Сбербаан каартата — 4276 7600 7398 7776

Владислав Андреев — Сбербаан каартата — 5484 7600 1017 0226

Ньургун Скрябин — Сбербаан каартата — 4276 7600 1267 3214

Владимир Егоров — Сбербаан каартата — 4274 2736 0446 2394

«Албан» тустууга сүгүрүйээччилэр кулууптарын аатыттан Егор Егорович Федоров, Сергей Гаврильевич Дмитриев уо.д.а,

«Көбүөргэ — сахалар» тустууга сүгүрүйээччилэр түмсүүлэрин ааттарыттан Василий Васильевич Попов,

«Чыпчаал» тустууга сүгүрүйээччилэр түмсүүлэрин ааттарыттан Анатолий Иванович Аммосов, Егор Егорович Стручков уо.д.а.

wrestdag.ru хаартыската.

+1
0
+1
0
+1
0
+1
0
+1
0
+1
0
+1
0