Саха сиригэр сүрдээх улахан антициклон дьайыытыттан, кэлэр нэдиэлэҕэ киин улуустарга улаханнык тымныйара сабаҕаланар. edersaas.ru
Бу туһунан норуот синоптига Тускул «Саха» НКИХ «Сонуннар» биэриитигэр кэпсээтэ:
— Өскө хоту улуустарга Охотскай муораттан, оттон арҕаа улуустарга Красноярскайтан кэлэр циклоннар итии салгыны аҕалан, бу эҥэр урукку сыллардааҕар халлаан арыый сылыйан турар эбит буоллаҕына, киин улуустар ханнык да циклоҥҥа хапсыбатылар. Онон Илин эҥэр уонна киин улуустарга кэлэр нэдиэлэ саҕаланыытыгар — 45 кыраадыстан саҕалаан, бүтүүтүгэр — 52-53 кыраадыс тымныйара сабаҕаланар.
Бүлүү эҥэр 31-35 кыраадыс тымныйыаҕа. Нэдиэлэ бүтүүтэ арҕаа улуустарга 32-37 кыраадыс буолуоҕа.
Халыма Индигиир улуустарын циклон хабан, ичигэс халлаан турар. Ол курдук, Аллараа Халымаҕа -23-25 кыраадыс тымныы. Аллайыахаҕа —күнүс -18, түүн — -24 кыраадыс тымныы. Анаабырга,—24-29 кыраадыс, Тиксии — 23-25 кыраадыс тымныы. Бу улуустарга 8 м тиийэр тыаллаах, тибиилээх.
Дьааҥы эҥэрэ Охотскайтан кэлэр циклоҥҥа хабыллан турар буолан, ичигэс халлаан турар. Манна -31-38 кыраадыс тымныы.
Тымныы полюһугар Өймөкөөҥҥө бу күннэргэ -51-55 кыраадыс тымныы. Нэдиэлэ бүтүүтүгэр бу улууска «сылыйыаҕа» — -46 кыраадыс тымныы.
Онон Тускул: «Кэлэр нэдиэлэттэн, киин улуустар олохтоохторо, тымныыга эрдэттэн бэлэмнэниҥ, оскуолаҕа оҕолору ыытаргытыгар күн-дьыл туругун билэ олоруҥ», — диэн сүбэлиир.
Елена ПОТОЦКАЯ, «Саха сирэ»хаһыат, edersaas.ru
Хаартыска: интернеттэн.