Бүгүн «Тэтим» араадьыйаҕа атырдьах ыйын 14-16 күннэригэр уонна кэлэр 15 хонукка өрөспүүбүлүкэҕэ хайдах халлаан буоларын туһунан Тускул анаарыытын билиһиннэрдэ.
Ийэ сайын сатыылаан турар кэмэ. Атырдьах ыйын 14 күнэ – Бастакы Ыспааһап, Ыспааһаптар ардахтара түһэр. Хотуур ортото. Ыҥырыа мүөт таһаарара уурайар.
Дьокуускай куоракка Бастакы Ыспааһап ардаҕа бэнидиэнньиккэ уонна оптуорунньукка түһүөҕэ. Намҥа нэдиэлэ саҥатыгар кыра ардахтаах. Хаҥалас улууһугар Бастакы Ыспааһап ардаҕа оптуорунньукка уонна сэрэдэҕэ бэлиэтэниэҕэ. Илин эҥэр улуустарыгар Мэҥэ Хаҥаласка, Уус Алдаҥҥа, Чурапчыга бэнидиэнньиккэ, оптуорунньукка, сэрэдэҕэ Бастакы Ыспааһап ардаҕа кыратык биллэн ааһыаҕа. Уустук балаһыанньаны көннөрөр ардах буолбатах эрээри, тыын ылларыан сөп. Аммаҕа уонна Уус Маайаҕа эмиэ бэнидиэнньиккэ, оптуорунньукка ардах баар. Ытык Күөлгэ уонна Томпоҕо баскыһыанньаҕа, бэнидиэнньиккэ, оптуорунньукка ардыаҕа. Горнай улууһугар бэнидиэнньик уонна сэрэдэ күн ардахтаах. Бүлүү эҥэр улуустарга бу субуотаҕа уонна бэнидиэнньиккэ кыра ардахтаах. Өлүөхүмэҕэ, Алдаҥҥа, Нерюнгригэ нэдиэлэ саҥатыгар эмиэ ардахтаах. Кэбээйигэ баскыһыанньа, бэнидиэнньик күннэргэ — ардах.
Эдьигээҥҥэ эмиэ бу эппит күннэргэ — ардах. Дьааҥы эҥэр улуустарыгар субуотаттан саҕалаан оптуорунньукка диэри ардахтаах. Халыма улуустарыгар субуота, бэнидиэнньик ардахтаах. Аллайыахаҕа нэдиэлэ бастакы күнүгэр ардыаҕа. Өймөкөөҥҥө ардах — сэрэдэттэн. Муомаҕа, Абыйга бэнидиэнньик уонна оптуорунньук күн ардахтаах. Анаабырга, Өлөөҥҥө улахан ардах суох. Тиксиигэ — нэдиэлэ саҥатыгар ардахтаах. Ити курдук,
үгүс улууска Бастакы Ыспааһап ардаҕа нэдиэлэ саҥатыгар биллэн ааһыаҕа.
Кэлэр 15 күн күн-дьыл билгэтэ
Ый туолар кэмигэр уонна бүтүүтүн саҕана ардахтаах. Бүлүү эҥэр улуустарыгар бу ыйга ардах кэмчи. Арҕаа улуустарга атырдьах ыйын 23 күнүттэн 26 күнүгэр диэри — ардахтаах. Кэбээйигэ уонна Эдьигээҥҥэ 16, 17 чыыһылаларга — этиҥнээх ардах, 23-24 чыыһылаларга эмиэ — ардахтаах. Өймөкөөҥҥө бу ыйга быстах ардах үгүс.Дьааҥыга атырдьах ыйын 14-17 күннэригэр — ардахтаах. Ый бүтэһигэр манна биллэ тымныйыаҕа.
Халыма уонна Индигир улуустарыгар быстах ардах үгүс. Өлөөҥҥө 23-24 күннэртэн тымныйыаҕа. Ол киин улуустарга биллэ охсуоҕа. Тиксиигэ уонна Анаабырга бу ый бүтүүтүгэр хаардыаҕа.
Елена ПОТОЦКАЯ, «Саха сирэ» хаһыат, edersaas.ru
Хаартыска — vesti14.ru