Интэриэһинэй Сүрүн

Тускул: «Киин улуустарга олунньуга — ичигэс»

Норуот синоптига Тускул үгэс быһыытынан ыйдарынан халлаан туругун билгэлиир.

Бүгүн олунньу ыйга үктэннибит. Бу ый үксүгэр тымныы буолар. Ол эрээри Тускул «ичигэс буолуо» диир.

Олунньу 12-с күнүгэр Дьыл оҕуһун биир муоһа тостор. Олунньу 24-с күнүгэр — иккис муоһа туллар. Кыра Одун чугаһыыр. Одун – ахсыс халлаан Айыыта. Одун Хаан дьылҕаны оҥорор. 

Дьыл уһуна — 220 хонук. Бу — кыстык кэмэ. Дьыл саҕаламмыта 110 хоммутун кэннэ, олунньу 1-гы күнүн “Дьыл оройо” диэн ааттыыллар. Кыһыҥҥы хонук аҥаара бүтэр. Кыстыкка бэлэмнэммит ас аҥаара сиэниллэр. Маҥхааһайга бурдук, кыбыыга от лоп курдук аҥаара хаалбыт буоллаҕына, үчүгэйдик сыл тахсыахха сөп.

Олунньуга саас кэлиитин уонна хайдах сайын кэлэрин буолуоҕун бэрэбиэркэлииллэр. Ый хаһыс күнүгэр сылыйар да, кэлэр ыйга ол кэмҥэ бэлиэтээһин буолар. Олунньуга сылаас, былыттаах буоллаҕына, сайына кураан, тымныы буоллаҕына – сайына ардахтаах. Тымныы тостор. Сис былыт олунньу 15-20 күннэригэр буолар.

Олунньуга үгүс киин улуустарга урукку сылларга тэҥнээтэххэ, ичигэс  буолара сабаҕаланар. Арай Оҕус 1-кы муоһа тостуон иннинэ олунньу 9, 10, 11 күннэригэр -45-47 кыраадыс тымныйан ылыа. Онтон ыла – сылыйыаҕа.  1-кы дэкээдэҕэ — хаар мэлигир, 2-с дэкээдэҕэ кыра соҕус хаардаах, онон бу ыйга хаар бүтэр. 3-с дэкээдэҕэ хаара кэмчи соҕус буолсу, көннөрү тымныйыыһы. Күнүс-23С-26С кыраадыс тымныы, түүн  -30С -34С  кыраадыс тымныы. Былырыын: I дэкээдэҕэ -51С-44С, II дэкээдэҕэ -41С-31С, III  дэкээдэҕэ -41С-28С.

Салгыы Тускул халлаан туругун сиһилии улуустарынан анаарбытын «Саха сирэ» хаһыат чэппиэрдээҕи нүөмэригэр ааҕыҥ.

 

Елена ПОТОЦКАЯ, “Саха сирэ” хаһыат, edersaas.ru

 

Хаартыска — Мария Васильева, СИА.

1
0
Telegram @edersaas20