![](https://edersaas.ru/wp-content/uploads/2018/04/IMG_7486-1068x712.jpg)
Бу күннэргэ үгүспүт: «Күөх Маай бырааһынньыгын өрөбүллэригэр хайдах күн-дьыл туруоҕай?» — диэн толкуйга сылдьабыт.
edersaas.ru
Норуот синоптига Тускул маныаха туох санаалааҕый? Бу туһунан кини Саха араадьыйатыгар маннык билиһиннэрдэ.
— Киин улуустарга өйүүҥҥүттэн — субуотаттан саҕалаан сылыйбытынан барыаҕа. Күнүс +8 кыраадыс сылаас, түүн -7 кыраадыс тымныы буолуоҕа.
Киин улуустарга Пиэрибэй Маайга күнүс +8 кыраадыс буолан, ылааҥы сааскы сылаас күн үгүс киһи санаатын көнньүөрдүөҕэ. Ыам ыйын 2 күнүгэр +12 кыраадыс сылаас буолуоҕа.
Бүлүү эҥээригэр субуота уонна өрөбүл күн түүн -6-8 кыраадыс тымныйыаҕа, күнүс +5+7 кыраадыс сылаас.
Мииринэй, Өлүөхүмэ улуустарыгар өрөбүл күннэргэ +8 сылаас буолуоҕа. Ыам ыйын бастакы күннэригэр манна +16 кыраадыс сылыйыаҕа.
Өймөкөөҥҥө өрөбүлгэ -19 кыраадыс тымныы. Күнүс ыам ыйын 1 күнүгэр +1 кыраадыс сылыйыаҕа.
Дьааҥыга субуотаҕа, өрөбүлгэ түүн -9 кыраадыс тымныы, күнүс +4 кыраадыс сылаас.
Муома уонна Халыма-Индигиир улуустарыгар Ийэ айылҕа сылааһыттан кыратык «бэрсиэҕэ». Түүн бу эҥэр -15 кыраадыс тымныы, күнүс +5 сылаас.
Ол оннугар Аллайыаха улууһа «көйгөлөнүүһү». Манна түүн -19 кыраадыс тымныы, күнүс -5 кыраадыс тымныы.
Булуҥ улууһугар -19 кыраадыс тымныы, Пиэрибэй Маайга — 1 кыраадыс тымныы.
Ыам ыйын бастакы күннэригэр сылааһынан «хатаҕалаан» баран, ыам ыйын 3 күнүттэн халлаан «буорту» буолуоҕа. Ол эбэтэр ыам ыйын 3-9 күннэригэр күн аайы хаардыыр уонна ардыыр. Бу сис былыт нэдиэлэни быһа туруоҕа. Оттон Өлөөҥҥө бу кэмҥэ буурҕа түһүөҕэ.
Муус устар 30 күнүгэр — өрөбүлгэ «куһаҕан күн» (неблагоприятный день). Бу ордук уруулга олорор дьоҥҥо сыһыаннаах. Араас саахал тахсыан сөптөөх күн. Онон бу күн ыраах айанныыртан туттунуҥ.
Дьэ, ити курдук Тускул билгэтинэн Күөх Маайбытын сырдык чаҕылхай күннээх, сылаас халааннаах көрсөбүт. Онон Пиэрибэй маайдааҕы демонстрацияларга киин куоракка уонна улуустарга күөх сааһы уруйдуу бэрт элбэх киһи тахсара буолуо. Даачаҕа тахсааччыларга сайыҥҥы күннэри көрсөргө бэртээхэй күннэр үүнүүһүлэр.
Ол эрээри ыам ыйын бырааһынньыктарын кэнниттэн тымныйарын умнубаппыт. Онон сылаас таҥаскытын ыраатыннарымаҥ.
Елена ПОТОЦКАЯ, «Саха сирэ» хаһыат, edersaas.ru
Хаартыска: интэриниэттэн.