Бүгүн, ыам ыйын 1 күнүгэр, норуот синоптигынан биллэр саха дьоно-сэргэтэ бары убаастыыр, ытыктыыр киһибит Тарас Тарасов-Тускул күн-дьыл билгэтин аны ханна да иһитиннэрбэтин-биллэрбэтин туһунан иһитиннэрдэ.
Кини улаханнык өһүргэнэн туран, санаатын маннык үллэһиннэ: «Мин да биир киһи тулуйарын тулуйа сатаатым. Социальнай ситимнэргэ күлүү-элэк оҥостоллорун, үөҕэллэрин көрбөт-истибэт буола сатаабытым хаһыс да сыла. Ол эрээри бу соторутааҕыта тарҕаммыт миигин аһаҕастык күлүү-элэк оҥостубут видеолара батсаапка уонна инстаграмҥа тарҕаммытын көрөн баран, тулуйбатым. Онон бэйэбэр быһаарыы ылынным — аны «Саха» НКИХ ханаалларыгар уонна «Тэтим» араадьыйатыгар, хаһыаттарга күнү-дьылы билгэлиир биэриилэрбин, ыстатыйаларбын тохтотобун. Мин дьоммун-сэргэбин, сүрүннээн тыа сирин дьонун, уһун ардахтан, күүстээх тыалтан-буурҕаттан, хаһыҥтан-хаартан эрдэттэн сэрэтэр, харыстыыр санаалаах ити биэриилэрбин толкуйдаан, дьон дьүүлүгэр таһаарбытым. Бу санаатыҥ да оҥорон кэбиспэт, уһун сыраны эрэйэр үлэ. Ол ону бииртэн-биир киһи өһүргэниэх тылы-өһү туттан, күлүүгэ-элэккэ кубулуттулар. Онон итинник куһаҕан кэмэлдьини тохтоттоххо табыллыыһы диэн санааттан, бу кэлиҥҥи күлүү оҥостубут видео ааптарын кытта сууттаһарга сананным. Уонна биэриибин дьон-сэргэ күлүүгэ кубулутар буолбутуттан, аны күнү-дьылы билгэлиирбин тохтоторго күһэлинним…»
Тыа сирин дьонун кутун туппут тапталлаах «Тускул билгэтэ» биэриибитин истэ үөрэммит үөрүйэхпитинэн оптуорунньук уонна бээтинсэ аайы төһөлөөх кэтэһэрбит биллибэт. Тоҕо саха дьоно бэйэ-бэйэбитин харыстаабаппытый, биллэр-көстөр талааннаах дьоммут үтүө ааттарын сиргэ-буорга тэпсэбитий? Хаһан өйдөнөрбүт буолуой бу? СӨ култууратын үтүөлээх үлэһитэ, «Саха» НКИХ Саха араадьыйатын дириэктэринэн өр сылларга үлэлээбит, билигин Чурапчы улууһун Хайахсыт нэһилиэгин баһылыга Тарас Лукич Тарасов — Тускул киһи күлүү-элэк оҥостор киһитэ буолбатах! Онон Тарас Лукич үтүө аатын киртиппит дьону дьүүлгэ таһааран, кырдьыгы булаары, бэйэтин чиэһин уонна достоинствотын көмүскүүргэ турунуута — сөптөөх дьыала. Оттон күөххэ үктэнии саҕана Тускулбут биэриитэ тохтообутун үгүспүт, биллэн турар, суохтуоҕа. «Тускул, хаһан араадьыйаҕа тахсаҕын? Эйигинэ суох олох сатаммытыбыт…», — диэн ыам ыйынааҕы бырааһынньыктар кэннилэриттэн «Тэтим» араадьыйатын батсааба «кытаран» олороро чахчы…
Елена ПОТОЦКАЯ, Саха сирэ хаһыат, edersaas.ru
Хаартыска: ааптар түһэриитэ