Кубулҕаттаах кулун тутар ый сылыйыа буоллар сылыйбат, тымныйыа буоллар тымныйбат — күнүс 10-ча кыраадыс сылыйан баран, түүн 30-тан тахса кыраадыс тымныйар.
edersaas.ru
Тымныы полюһугар Өймөкөөҥҥө бу күннэргэ — 50 кыраадыс тымныйда. Норуот синоптига Тускултан: «Хаһан сылыйарый бу?» — диэн ыйыппыппар, киһим хоруйа өссө соһуччу буолла!
— Кэлэр нэдиэлэҕэ оптуорунньукка — кулун тутар 20 күнүгэр эмискэ сылыйыаҕа. Бүлүүгэ, Ленскэйгэ, Өлүөхүмэҕэ «плюсовой» кыраадыс буолуоҕа. Ол курдук, Сунтаарга, Мииринэйгэ уонна Ленскэйгэ +2 кыраадыс сылыйара күүтүллэр. Сунтаарга оннооҕор ардах түһүөн сөп. Оннук улаханнык сылыйыаҕа. Тымныы кэмҥэ эмискэ сылыйыы улахан тыалы кытта эҥэрдээх буолар. Бу ааттаммыт улуустарга күүстээх тыал, оттон Өлөөҥҥө буурҕа түһүөҕэ. Ол эрээри итинник күүстээх сылыйыы бу улуустарга биир эрэ күн туруоҕа. Сарсыныгар, ол эбэтэр кулун тутар 21 күнүгэр күнүс -10 кыраадыс, түүнүгэр — 30 кыраадыс буолуоҕа.
Киин улуустарга кулун тутар 22 күнүттэн сылыйыаҕа. Оттон кулун 24-25 күннэриттэн халлаан массыыналары дьиэ таһыгар туруорар гына сылыйыаҕа. Миигиттэн бу күннэргэ дьон өрүү: «Хаһан массыынаны таһырдьа туруорар гына сылаас күннэр саҕаланналларый?» — диэн ыйытар. Дьэ, онон күүтүүлээх кэмҥит кэлэр нэдиэлэттэн саҕаланар, — диэн бэлиэтиир Тускул.
— Биир күн эмискэ сылыйыы, онтон эмиэ тымныйыы тугу кытта сибээстээҕий? —— диэн ыйытыыбар норуот синоптига:
— Красноярскайтан сылаас балаһа циклон иһэр. Ол иһин Арҕаа, Бүлүү бөлөх улуустарынан, Кэбээйини уонна Дьааҥыны хабан биир-икки күн эмискэ сылыйыаҕа. Онтон бары улуустарга сыыйа сылыйыы — кулун тутар 24 күнүттэн, — диэн быһаарда.
— Сааскы ылааҥы күннэр саҕаланыылара, кырдьык, быйыл уһаата. Дьиҥэр сууккатааҕы температура нуорма быһыытынан 7-8 кыраадыс араастаһыылаах буолуохтаах этэ. Оттон билигин күнүскү температураттан түүҥҥү кыраадыс 20-ча кыраадыс араастаах. Биллэн турар, бу сүрэх, тымыр, хаан баттааһыныгар улахан охсуулаах. 2014 сыллаахха кулун тутар 21 күнүгэр Дьокуускайга ардах түспүтэ. Ол түбэлтэни үгүс киһи умнубута чахчы. Быйыл ол дьыл эргийэн кэлээри турар, — диэн санаатын үллэстэр Тускул.
Дьэ, онон кэлэр нэдиэлэттэн сылыйарын кэтэһэбит.
Елена ПОТОЦКАЯ, «Саха сирэ» хаһыат, edersaas.ru
Хаартыска — интернеттэн.