Сүбэһит Эдэр саас

Тускар туһан: уу турбатынан парник

Поддонтан миэбэл оҥорбут дьоруойбут Константин Трифонов уу турбатыттан уонна тутууттан хаалбыт матырыйааллары туһаҕа таһааран таһырдьа үүнэр оҕурсуга уонна помидорга парник оҥорбутун туһунан ааҕааччыларбытын кытары үллэстэр.

Куорат эҥэрдээҕи чааһынай дьиэлэр дьоҕус учаастактарыгар сөптөөх судургутук оҥоһуллар бэртээхэй парниктары оҥостон, бэйэ үүннэрбит оҕуруот аһын сиир быдан туһалаах даҕаны, барыстаах даҕаны.

Туох хайа иннинэ парник хоруудатын оҥоробут, бэлэмнэниллибит буору кутабыт. Онно сөп түбэһэр араама оҥорон үрдүгэр тимир турба тобоҕуттан оҥоһуллубут хомууттары саайталыыбыт. Парник кэтэх өттүн иэччэхтэринэн туттартыыбыт.

Парник каркааһын боросуой уу турбатынан оҥоробут. 25-тээх  уу турбатын тэҥ гына бысталаан араамаҕа эрдэ бэлэмнэниллибит  хомууттарга  кэтэрдэбит.

Көстүүтэ үчүгэй буоларын гына мас кырааскатынан сотобут. Парникпытын салапаанынан бүрүйэбит.

Тыалга-кууска бэриммэт гына уонна судургутук арылларын-сабылларын наадатыгар икки өттүнэн хатанар күрүчүөгүнэн туттарабыт.

Парник иккис көрүҥүн хоруутаттан тута уу турбатынан каркас ыытан, салапаанынан сабыллар парник оҥоруохха сөп.

 

Надежда Ильина, edersaas.ru

4
1