Кулун тутар 18 күнүгэр дойду бэрэсидьиэнин талыахпыт. Саха дьоно урут-уруккуттан быыбарга көхтөөхтүк кытталлар. Дьон-сэргэ туох санаалаах кыттарын туһунан туоһуластыбыт.
Руслан Шамаев, М.К Аммосов аатынан ХИФУ тэрийэр үлэҕэ отделын салайааччы:
— Дойду бэрэсидьиэнин талар быыбарга бэйэм тус санаабын, көрүүбүн этэ барабын. Мин быһаарыныым дойдубар сөптөөх, туhалаах киhини таларга көмө буолуо диэн итэҕэйэбин.
Аян Аммосов, ССТХТ 3 кууруһун устудьуона:
— Мин быыбарга бастакы куоластааһыным буолар. Онон хайаан да барабын. Мин санаабар, куоластааһын эппиэтинэстээх, дойдубут сайдыытыгар улахан суолталаах.
Петр Куркутов, И.М. Романов аатынан Төхтүр орто оскуолатыгар дириэктэри иитэр үлэҕэ солбуйааччы:
— Буолаары турар быыбарга дойдум дьылҕата быһаарыллар. Дойдубут ханнык суолунан сайдарын таларбытыгар биһиэхэ Конституциянан быраап бэриллэр. Ити быраабы туһаммат улахан сыыһа. Быыбарга биир куолас быһаарыылаах буолааччы. Хас биирдии киһи быыбарга кыттыахтаах дии саныыбын.
Анастасия Ноева, харах бырааһа:
— Бэрэсидьиэн быыбарыгар хайаан да бараммын куоластыыбын, тоҕо диэтэххэ, мин биир да быыбары көтүппэппин, бырааһынньык курдук. Ол иһин быыбардыыр учаастагым ханна баарын билэбин. Мин санаабар, хас биирдии киһи төрөөбүт дойдутун инники дьылҕатын туһугар долгуйар буоллаҕына, куоластыахтаах.
Николай ПОПОВ, Афанасий НОЕВ, «Саха сирэ» хаһыат, edersaas.ru