Кулун тутартан “Тус дааннайдар тустарынан” сокуоҥҥа уларыйыылар киирдилэр.
Холобур, киһи маҕаһыынтан тугу эмэ атыылаһарыгар, бэйэтин туһунан дааннайдары (аатын, төлөпүөнүн нүөмэрин, электроннай буостатын) хаалларарыгар көрдөһөллөр. Сороҕор маҕаһыыннар бу дьон дааннайдарын атын тэрилтэҕэ атыылаабыт буолаллар. Ол түмүгэр, бу киһиэхэ бааннар, атын да тэрилтэлэр бэйэлэрин өҥөлөрүн эрэкэлээмэлээн, эрий да эрий буолаллар.
Бу кэмтэн ыла маннык информацияны тарҕатар бобуллар.
Сокуон быһыытынан, киһи бэйэтин туһунан ханнык информацияны таһаарарын бэйэтэ талар буолар. Холобур, социальнай ситимҥэ кини бэйэтин туһунан таһаарбыт, эбэтэр, урут интэриниэккэ тарҕаммыт да эбит буоллаҕына, бу информацияны туһанарга быһаарыммыт тэрилтэ аны сокуоннайдык ылбытын туһунан дакаастыахтаах. Ол эбэтэр, киһи бэйэтин сөбүлэҥин биэрбит буолуохтаах.
Оттон бу киһи бэйэтин туһунан информацияны сотторуон баҕарар буоллаҕына, бастакы модьуйуу кэнниттэн, тэрилтэ тута сотторор, суох гынар эбээһинэстэнэр.
Ангелина Васильева, «Саха сирэ» хаһыат, edersaas.ru
Хаартыска: rg.ru