Улахан хаһаайыстыба салайааччыта «хаасса арыттаһыытын» суох оҥорорго туруорсар
“Күндээдэ” ААУо — Ньурба улууһугар саамай улахан уонна өрөспүүбүлүкэҕэ 5 бөдөҥ иһигэр киирсэр хаһаайыстыба: 566 ынах сүөһүлээх, 400-чэ сылгылаах. Үүтү уонна эти оҥорон таһаарар. Акциялаах уопсастыбаны 2017 сыл сэтинньититтэн Александр Алексеев салайар.
edersaas.ru
Хаһаайыстыба 57 үлэһиттээх, ол иһигэр 17 киһи быстах кэмҥэ дуогабарынан үлэлиир. “Күндээдэ” ААУо ааспыт үс сылга министиэристибэ сүөһү иитэр хаһаайыстыбалары үп-харчы өттүнэн чэбдигирдэр бырагырааматыгар хапсан, өрөспүүбүлүкэ уонна улуус бүддьүөттэриттэн көбүччү үбүнэн көмөлөһүннэрэн кэллэ. Салгыы өссө икки сыл “чэбдигирэр” буолла. Былырыын дойду таһымыгар племенной репродуктор-хаһаайыстыба статуһун ылбыт. Онон ынах уонна биэ төбөлөрүгэр 7-лии тыһ. солк. кээмэйдээх субсидия кэлэр.
“Күндээдэ” ААУо 4 хотоннооҕуттан иккитэ 2012-2013 сылларга тутуллан киирбиттэрэ. Олорго 100-түү ыанньык турар. Бастакы хотону өрөспүүбүлүкэ 87 бырыһыанын толуйан, төлөһөн бүппүттэр. Иккис хотон ороскуотуттан 67,5 бырыһыана толуйуллубут. Бырыһыанын төлөһөн, сүрүн иэстэригэр быйылгыттан дьэ киирбиттэр. Генеральнай дириэктэр этэринэн, аны 10 мөл. солкуобайы төлүүллэрэ хаалбыт.
“Улахан оҕо кыһалҕата – улахан” диэбиккэ дылы, Александр Прокопьевич тыа хаһаайыстыбатын тэрилтэтэ өссө тэтимнээхтик сайдыаҕын “хаасса арыттаһыыта” тахсара атахтыырын ыйар. Биллэрин курдук, үүт сайыҥҥы ыйдарга үгэннээн элбиир, эт күһүн идэһэ саҕана биирдэ оҥоһуллар. Онон хаһаайыстыба, сүнньүнэн, ити кэмҥэ эрэ дохуоттанар кыахтаах. Нолуогу кэмигэр төлөөбөтөххүн, үлэһиттэр хамнастарын кэмигэр биэрбэтэххин борокуратуура кыраҕытык кэтээн көрөр. Ол охсуутугар кини иннинэ үчүгэйдик үлэлии олорбут салайааччылар дуоһунастарыттан тэбиллибиттэрин аһаҕастык этэр. “Үп-харчы кэмигэр хамсыырын хааччыйар инниттэн үөһэ таһымҥа сөптөөх быһаарыы ылыллара буоллар”, — диир “Күндээдэ” ААУо генеральнай дириэктэрэ Александр Алексеев.
Василий НИКИФОРОВ, edersaas.ru