Үүнэн эрэр 2021 сылынан эҕэрдэлэһии, дьаҥнаах сыл дьэ түмүктэнэн эрэр диэн үөрүү-көтүү үгүс. Бу күннэргэ Саха сирин олохтоохторугар Турцияттан эҕэрдэ көтөн кэллэ.
Эдэр саас саайт үлэһиттэрэ эҕэрдэни ыыппыт Анкара университетын билиҥҥи түүр тылларын кафедратын аспирана, билим үлэһитэ, саха тылын чинчийээччи Үмит Шаһинтан аҕыйах ыйытыыга хоруйдууругар көрдөстүбүт.
— Үмит, Саҥа дьылы ханна, хайдах көрсөр былааннааххын?
— Быйыл Саҥа дьыл бырааһынньыгын соҕотоҕун дьиэбэр көрсөр санаалаахпын. Тоҕо диэтэр, дойдубут салайааччылара ахсынньы 31 күнүттэн — тохсунньу 2 күнүгэр диэри таһырдьа тахсарбытын боптулар. Тоҕо маннык ыйаах таһаарбыттарын эттэххэ, Саҥа дьыл курдук күннэргэ дьон бириэмэлэрин чугас дьонун кытта атаараллар. Ити билиҥҥи куһаҕан дьаҥ кэмигэр наһаа кутталлаах. Дьон билбэккэ бэйэ-бэйэлэрин ыккардыларыгар вируһу сыһыарыхтарын сөп. Бассаабынан эрэ эрийэн чугас дьоммун эҥэрдэлиирим буолуо. Быйыл маннык буоларыгар тиийэр. Кэлэр сылга уруккулуу алтыһыахпыт диэн эрэнэбин.
— Саҥа дьылга туох үгэстээххитий?
— Турцияҕа үгүстэр Саҥа дьылы дьиэлэригэр чугас дьоннорун кытта бииргэ көрсөллөр. Аһылык арааһа астанар, остуол оонньууларын оонньуубут, ырыа ыллыыбыт, үҥкүү бөҕөтө… Сорохтор банкеттыыр саала курдук сирдэргэ, туристическэй куораттарга бараллар, онно тэриллибит Саҥа дьылы көрсөллөр, тэрээһиннэргэ кыттыһаллар.
Биһиги саҥа дьылы көрсөр үгэспит өрөспүүбүлүкэбит төрүттэммитин кэнниттэн сокуонунан Григорианский халандаарга көспүппүтүн кэнниттэн саҕаланар. Урут Ислам итэҕэлин сиэригэр-туомугар баар халандаарынан дьылы хонугу ааҕаллар эбит.
— Турцияҕа билигин дьаҥ хайдаҕый?
— 2020 сыл кулун тутар ыйыгар куһаҕан дьаҥ биһиги дойдубутугар эмиэ тиийэн кэлбитэ. Ону салайааччыларбыт таһаарбыт ыйаахтарынан бастакы үс-түөрт ый сэрэнэ сылдьыбыт буоламмыт, ыалдьыбыт дьон ахсаана элбээбэтэ. Сайын дьон онно-манна сылдьыыта үгүс. Ол иһин алтынньыга-сэтинньигэ эмиэ киэһэ үлэ чааһын кэнниттэн уонна өрөбүллэргэ таһырдьа тахсары боппуттара.
— Билигин хайдах үлэлии сылдьаҕыт?
— Бииргэ үлэлиир кэллиэгэлэрбитин кытта уочаратынан үлэбитигэр барабыт. Холобур, нэдиэлэ бастакы күнүгэр мин, иккис күҥҥэ атын киһи, үһүс күҥҥэ атын киһи барар. Үгүс дьыалаларбытын дьиэбитигэр олорон оҥоробут.
— Ээ сөп. Хоруйуҥ иһин махтал, кэлэн иһэр Саҥа сылынан эҕэрдэ!
Людмила ПОПОВА, “Саха сирэ” хаһыат, edersaas.ru
Хаартыска: depositphotos.com