Соторутааҕыта Турция Невшехир куоратыгар «23 Нисан» (ол аата муус устар ый) диэн ааттаах оҕолор аан дойдутааҕы 39-с бэстибээллэрэ буолан ааста. edersaas.ru
— Муус устар 23 күнэ — Турция суверенитетын уонна оҕолорун күнэ. Онно анаммыт тэрээһиҥҥэ Дьокуускай куорат 2-с нүөмэрдээх оскуолатын «Тускул» бөлөҕө ситиһиилээхтик кыттан кэллэ.
Невшехир — Каппадокия киин куората. Бэрт дириҥ историялаах. Холобура, бастакы христианнар хайа хапчааннарыгар хаһан оҥорбут таҥараҕа үҥэр сирдэрэ ити куорат таһыгар баар. Оҕолор турок ыалларыгар олордулар, билистилэр, доҕордостулар.
Оҕолор бэстибээл үс түһүлгэтигэр үҥкүүлээтилэр. Ону Турция тэлэбиидэнньэтэ быһа эфиринэн көрдөрдө. Сэҥээрэр дьон Дьокуускайтан интэриниэтинэн оҕолор үҥкүүлэрин көрдүлэр, — диэн кэпсиир “Аттила” култуура киинин дириэктэрэ Алексей Томскай.
Бэстибээл бырагырааматын чэрчитинэн оҕолор биир күн Турция киин куоратыгар Анкараҕа тиийэн, Ататюрк мавзолейыгар сылдьыбыттар. Турция бэрэсидьиэнин, премьер-миниистирин, парламент спикерин кытта көрсүһүүлэргэ кытыбыттар.
Төннөн иһэн Стамбул куораты уонна Москваны көрбүттэр. Москваҕа Турция посольствотын ыҥырыытынан ыалдьыттаан, дипкуорпус оҕолорун кытта анал кэнсиэр көрдөрбүттэр.
— Тэрээһиҥҥэ ситиһиилээхтик кыттарбытыгар көмөлөспүт оҕолор төрөппүттэригэр, 2-с нүөмэрдээх оскуола дириэктэригэр Алексей Семеновка уонна оскуола кэлэктиибигэр истиҥ махталбын тиэрдэбин, — диэн махтанна Алексей Томскай.
Турция курдук ыраах сиргэ саха оҕолоро төрөөбүт дойдуларын култууратын билиһиннэрэн, бэйэлэрэ сайдыылаах дойду култуурунай олоҕун кытта билсэн, билиилэрэ-көрүүлэрэ хаҥаан кэллэ.
Елена ПОТОЦКАЯ, «Саха сирэ» хаһыат, https://edersaas.ru