Турция омуктар дьыалаларыгар миниистирэ Мевлют Чавушоглу Арассыыйа гражданнара кыраныысса таһынааҕы пааспара суох бу дойдуга киирэллэрин көҥүллүөхпүтүн сөп диэн эттэ.
Ол эбэтэр, Турцияҕа Арассыыйа пааспарын эрэ көрдөрөн баран, айанныахха сөп диэн этэр. Муус устарга миниистир Мевлют Чавушоглу уонна Турция бэрэсидьиэнэ Тайип Эрдоган Арассыыйаҕа кэлэн, дойдулар икки ардыларыгар сыһыаны олохтуурга кэпсэтиилэри ыытыахтара.
Санатар буоллахха, 1990-2000-с сылларга Турцияҕа киирии судургутуйбута: визаны кыраныыссаны туоруурга оҥорторуохха сөп этэ. 2010 сылтан Арассыыйа уонна Турция бииргэ үлэлэһиилэригэр сөбүлэһии түһэрсэн, 30 күн визата суох сылдьыахха сөп буолбута. 2013 сыллаахха Турция бу болдьоҕу 60 күн, 2017 сылтан 90 күн визата суох сылдьарга уһаппыта.
Уонча сыллааҕыта Арассыыйа олохтоохторо Турцияҕа маассабайдык баран сынньанар буолбуттара. Сыаната чэпчэкитэ, айылҕата кэрэтэ, муората ырааһа, ону тэҥэ, отелларга босхо ас-үөл элбэх дьону угуйбута. Арассыыйа олохтоохторун суотугар Турцияҕа туризм балысханнык сайдыбыта уонна дойдуга барыһы киллэрэр сүрүн хайысханан буолбута.
Ол эрээри, кэнники кэмҥэ дойдулар икки ардыларыгар сыһыан сойон, турист ахсаана аҕыйаабыта. Туроктар урукку “тот” кэми төннөрөн, туризмы сайыннарарга хардыылары оҥороллор.
Ангелина ВАСИЛЬЕВА, “Саха сирэ” хаһыат, edersaas.ru