Омук сиригэр сынньанар туру туроператор кыайан оҥорботох буоллаҕына, турист харчытын хайдах төннөрүөн сөбүй?
Бастатан туран, туроператоры кытта кэпсэтэн, атын хайысхаҕа саҥа путевка оҥорторон көрүөххэ сөп. Эбэтэр кыаллар буоллаҕына, туру атын болдьоххо көһөрө сатааҥ.
Өскөтүн ити үөһээ этэн аһарбыт сүбэлэрбит кыайан табыллыбат буоллахтарына, турист путевкаҕа бараабыт харчытын төннөрөргө модьуйар бырааптаах. Көҥүл өттүнэн харчы төннүбэтэҕинэ, суут нөҥүө харчытын төннөрөргө күһэллэр.
Маннык балаһыанньаҕа хайдах буолар туһунан Ростуризм салайааччыта Зарина Догузова сиһилии кэпсээтэ.
«Санкциялартан сылтаан туроператордарга балай да элбэх кыайан толорботох эбэһээтилистибэлэрэ мунньулунна. Уустук балаһыанньаҕа туристар даҕаны, туроператордар даҕаны киирдилэр. Биһиги бу түгэҥҥэ бары кыттыылаахтар интэриэстэрин төһө кыалларынан көмүскүү сатыыбыт. Бастатан туран, атын, билигин көтүөххэ сөп хайысхаҕа саҥа путевка оҥоро уонна төһө кыалларынан путевканы атын болдьоххо көһөрө сатыыбыт” — диир Зарина Догузова
Урбаан бу хайысхатын туругун харыстыыр олус улахан суолталаах, өскөтүн ханнык эмит туроператор тэрилтэ эһиннэҕинэ туристара улахан кыһалҕаҕа киириэхтэрин сөп. Ростуризм салайааччыта этэринэн, сорох омук таһынааҕы турдары Арассыыйа иһигэр баар бэрт сонун турдарга уларытыы сөбүлэһиилэрэ тарҕанан эрэр эбит.
Харчы тута эргиллибэтин биир сүрүн сылтаҕынан төлөммүт харчы сороҕо тас дойду өҥө оҥорооччуларыгар тиксэриллибитэ буолар. Онон туроператордар төннөрүү уустук кыһалҕатын быһаара сатыыллар. Ол да буолар көҥүл өттүнэн, эбэтэр суут нөҥүө турист харчытын көрдүүр сокуоннай бырааптаах.
Саха сирэ» хаһыат, edersaas.ru
Хаартыска ПрофиТравел