Красноярскайдааҕы турнир бүтэһик күнүгэр эр дьон 65, 70 уонна 97 кг ыйааһыннарыгар мэтээллэр оонньонуохтара.
Петр ПАВЛОВ, “Саха сирэ” хаһыат, www.edersaas.ru
65 киилэҕэ отут кыттааччы баар. Кинилэртэн ааттаах-суоллаах бөҕөстөрүнэн Россия чемпиона, Европа дойдуларын оонньууларын призера дагестанец Ильяс Бекбулатов, Европа чемпиона, аан дойду чемпионатын призера буола сылдьыбыт осетин Алан Гогаев, Европа эдэрдэргэ күрэхтэһиитин кыайыылааҕа чеченец Иман Аджиев буолаллар.
Саха сириттэн студеннарга аан дойду чемпионатын призера Виктор Степанов үөһэ бөлөххө, оттон Казахстаҥҥа ыытыллыбыт норуоттар икки ардыларынааҕы турнир кыайыылааҕа Константин Власов, Үрдүкү спортивнай маастарыстыба оскуолатын аһаҕас чемпионатыгар бастаабыт Иван Ефремов аллараа бөлөххө бааллар.
Степанов утарсааччыта – Россия эдэрдэргэ күрэхтэһиитин кыайыылааҕа, тувинец Байыр Ондар. Уопсайынан ылан көрдөххө, Виктор бөлөҕөр бары да кэриэтэ тэҥ баайыылаах бөҕөстөр киирбиттэр. Кини тустар таһымын билэр киһи быһыытынан, саба быраҕан эттэххэ, мэтээлгэ тиксэр кыахтаах дии саныыбын. Барыта бэйэтиттэн тутулуктаах.
Ол оннугар иккис бөлөх састааба күүстээх буолбут. Били үөһээ ахтыллыбыт бөҕөстөр үһүөн манна бааллар. Сэрэбиэй быһыытынан Власов – Иван Филипповтыын, Ефремов – Менги Мортуй Ооллуун тустар буолбуттар. Эдэр уолаттарбытыгар ыарахан буолуоҕа диэн эрдэттэн этиэххэ сөп.
70 кг ыйааһыҥҥа 26 кыттааччы баар. Кинилэр ортолоругар саха тустууга кыһатын иитиллээччилэрэ үһүөлэр. Кинилэр үһүөн аллараа бөлөххө түбэспиттэр. Герман Устинов күүстээх бөҕөскө түбэспит. Хусейн Суюнчев – норуоттар икки ардыларынааҕы турнирдар кыайыылаахтара уонна призердара. Бу киирсиигэ хайата кыайбыта сэрэйдэххэ, Евгений Жербаевка тахсыаҕа.
Индиятааҕы турнир кыайыылааҕа буолан бу күрэхтэһиигэ киллэриллибит Тимур Николаев — Талбудин диэн Казахстан бөҕөһүн, оттон Дьулустаан Сивцев монгол Баттулганы кытта тустуохтара.
Онон бу ыйааһыҥҥа кыттар уолаттарбыт сэрэбиэйдэрэ ыарахан буолбут диэн билиниэххэ наада. Ол курдук, Кадимагомедов, Суюнчев, Жербаев, Сидаков, Джукаев – күүстээхтэринэн биллэллэр. Оттон үөһээ бөлөххө Касумов, Арсаналиев, Хизриев, Аминов, Гиниятуллин курдук биллэр бөҕөстөр бааллар. Мэтээллэри чуо ити ааттаммыт бөҕөстөр бэйэлэрин икки ардыларыгар үллэстэллэрэ буолуо диэн сабаҕалыыбын.
97 киилэҕэ — уон ахсыалар. Кинилэртэн уонна уопсайынан даҕаны, бу турнир саамай улахан ааттаах-суоллаах кыттааччытынан олимпийскай чемпион Кайл Снайдер (АХШ) буолар. Манна Евгений Коломиецпыт кыттар. Кини дагестанец бастаан Расул Магомедовтыын тустар буолбут. Манна хайалара кыайбыта, Белоновскай-Черткоев пааратын кыайыылааҕар тахсыаҕа.
Билгэлээһин быһыытынан эттэххэ, үөһээ бөлөхтөн Снайдер холкутук финалга тахсара буолуо. Ол оннугар иккис бөлөххө Коломиец, Магомедов, Белоновскай, Байцаев, Власко курдук тэҥ күүстээхтэр мустубуттар. Тус санаабар, мантан Байцаев финалга тахсара буолуо. Чэ, билгэлээһин төһө сөптөөҕүн дуу, сыыһатын көбүөр көрдөрүө.
PS: Турнир хаамыытыгар туох эмэ өйдөммөт түгэннээх, эбэтэр ыйытыылаах буоллаххытына, бука баһаалыста бу суруйуу аннынан бэриллэр “Санаа атастаһыытыгар” кыттыһыаххытын сөп. Онно син эмиэ бэҕэһээҥҥи курдук, саха бөҕөстөрүн тустууларын тутатына сырдатан иһиэхпит.
Петр ПАВЛОВ, “Саха сирэ” хаһыат, www.edersaas.ru